Аналар денсаулығын сақтау басқармасының басшысы Шәкизат Халықова жасөспірім қыздар арасында 257 аборт тіркелгенін айтты, деп хабарлайды Ulysmedia.kz.
1651 ЖҮКТІЛІК ТІРКЕЛГЕН
Бүгінгі таңда 270 мыңға жуық әйел жүктілік бойынша есепте тұр.
Жыл басынан бері 18 жасқа дейінгі жеткіншектер арасында 1 651 жүктілік және 257 аборт тіркелді.
Ай сайын 18 жасқа дейінгі жүктілік пен аборт саны қаралып отырады. Былтыр 2023 жылдың 9 айында жасөспірімдер арасында 2 288 жүктілік пен 385 аборт тіркелген еді. Ал биылғы 9 айда – 1651 жүктілік және 257 аборт болған, – деді Ш. Халықова Орталық коммуникациялар қызметінде өткен баспасөз мәслихатында.
СТАТИСТИКА ҚАЛАЙ ЖҮРГІЗІЛЕДІ
Спикер 14 жасқа дейінгі және 15-17 жас аралығындағы жүктілік статистикасы бөлек жүргізілетінін атап өтті.
Өткен жылы 14 жасқа толмаған қыздар арасында 9 жүктілік жағдайы анықталды. Әрине, мұндай ерте жаста көп жағдайда зорлық-зомбылық салдарынан жүкті болған жағдайлар бар, бұл енді Әділет министрлігінің құзырындағы ақпарат. Біздің міндетіміз – жүктіліктің барлық кезеңінде медициналық көмек көрсету және бұл көмектер толыққанды көрсетілді. Биыл 14 жасқа толмаған 6 қыз бала көтерген, – деп толықтырды Ш. Халықова.
Еске салсақ, бұған дейін Қазақстанда 15 жастағы ұлдардың 35%-ы қорғалмаған жыныстық қатынасқа түсетінін жазған болатынбыз.