Қаңтар оқиғасы кезінде ұсталған Арман Жұмагелдиев, Қайрат Құдайберген, Руслан Ысқақовпен қатар оннан аса сотталушыға бүгін үкім шығады, деп хабарлайды Ulysmedia.kz.
Қылмыстық іс 2022 жылғы қайғылы оқиғалардан кейінгі басты істердің бірі саналады. Сотталушы орындықта 42 адам – барлығы Қаңтар оқиғасы кезінде тәртіпсіздіктерге қатысты немесе ұйымдастырды деп айыпталып отыр. Ulysmedia.kz үш жылға созылған тергеу амалдарының хронологиясын там-тұм ақпараттар негізінде жүргізген еді.
Арман Жұмагелдиев, Қайрат Құдайберген, Руслан Ысқақов және басқа да айыпталушылардың сот процесі жабық режимге ауыстырылған. Іс "құпия" деген белгімен өтіп жатқанына қарамастан желіде сот процесінің фрагменттері видео арқылы тарап кеткен. Айыпталушылардың бірі — ҰҚК 5-ші департаментінің басшысы Руслан Ысқақ Қаңтар оқиғасы кезіндегі тәртіпсіздіктер кезінде оған бірінші президент Нұрсұлтан Назарбаевтың немере інісі әрі ҚР ҰҚК төрағасының орынбасары болған Самат Әбіш бұйрық бергенін мәлімдеген еді.
Жұмагелдиев 2022 жылдың 7 қаңтарында ұсталды. Оған атыс қаруын заңсыз сақтау және 2022 жылдың қаңтарында болған тәртіпсіздіктерге қатысты деген айып тағылып, онымен бірге тағы бес күдікті ұсталған. Бас прокуратура Жұмагелдиевтің қарулы адамдары 24 бейбіт азаматты – кездейсоқ өтіп бара жатқан адамдарды ұрлап, күштеп ұстады деп мәлімдеді.
Бұған дейін Жұмагелдиев президент Қасым-Жомарт Тоқаевқа бейне үндеу жазған болатын. Ол өзінің қылмыстық ісін "объективті, айыптаусыз" тергеуді сұраған. Ол өзін Қаңтар оқиғаларының басқа қатысушылары сияқты рақымшылыққа лайықпын деп есептейді.
Маусым айында Жұмагелдиев азаптау ісінде жәбірленуші деп танылғаны белгілі болды. Сол айда оны ұсталған сәтінің жаңа кадрлары жарияланды.
Құдайберген 2022 жылдың сәуір айында ұсталды. Ол жаппай тәртіпсіздіктер ұйымдастырды, сондай-ақ Жұмагелдиевпен байланыста болды деген күдікке ілінген.