«Түк пайдасы жоқ»: Трамп АҚШ білім министрлігін жоятын жарлыққа қол қойды

Трамп қол қойған жарлыққа сәйкес, ведомствоның өкілеттіктері берілген кезде қызметтер, бағдарламалар мен жеңілдіктердің тиімді әрі үздіксіз көрсетілуі қамтамасыз етілуі тиіс.

Трамптың айтуынша, АҚШ білім министрлігі 1979 жылы 39-президент Джимми Картердің бастамасымен құрылған. Ақ үй басшысының пікірінше, бұл ведомствоны тарату білім беру бағдарламаларының тиімділігін арттырады.

"Біз оны мүмкіндігінше тез жабамыз, – деп мәлімдеді АҚШ президенті. – Ол бізге ешқандай пайда әкелмейді."

Ол қазіргі таңда америкалық оқушылардың оқу және математика бойынша көрсеткіштері тарихи минимумға жақын екенін атап өтті.

«Биылғы Ұлттық білім жетістіктерін бағалау нәтижелері сегізінші сынып оқушыларының 70%-ының оқу, ал 72%-ының математика бойынша орташа деңгейден төмен көрсеткіш көрсеткенін анықтады. Білім беру саласындағы федералдық бюрократия өз тиімділігін дәлелдей алмады», – делінген жарлықта.

Трамптың айтуынша, студенттерге арналған федералдық несие бағдарламасының көлемі ірі америкалық банктердің бірі – Wells Fargo-ға теңесе бастаған. Алайда, аталған банкте 200 мыңнан астам қызметкер жұмыс істесе, Білім министрлігінің студенттерге қаржылай көмек көрсету басқармасында бар болғаны 1,5 мың адам ғана еңбек етеді.

«Білім министрлігі – банк емес. Сондықтан ол несиелік қызметтерді америкалық студенттерге сапалы қызмет көрсете алатын ұйымға беруі тиіс», – деді Трамп.

Reuters басылымының жазуынша, АҚШ президенті федералдық ведомстволарды өз бетінше тарата алмайды, өйткені бұл өкілеттіктер тек Конгреске тиесілі.

Егер Өкілдер палатасында жеткілікті дауыс жинау мүмкін болса, Сенатта Республикалық партияның небәрі 53 орны бар. Бұл дегеніміз, осындай заң жобасын қабылдау үшін қажет 60 дауысты жинауға тағы 7 сенатордың қолдауы керек.

«Сенаттағы демократтар Білім министрлігін тарату бастамасын қолдайтынын білдіретін ешқандай белгі берген жоқ» деп жазады басылым.