Желіде сәуірдегі референдумда ҚХА Қазақстанның Ресей құрамына кіруін талқылайтыны туралы ақпарат тарады, деп хабарлайды Ulysmedia.kz.
ЖАЛҒАН АҚПАРАТ
WhatsApp-та Қазақстан халқы Ассамблеясы (ҚХА) 23-24 сәуірде референдум өткізетіні туралы хабарлама тарады. Күн тәртібіндегі мәселе – Беларусь елі секілді Қазақстанның да Ресеймен одақтас мемлекет болуы. Хабарламада Қазақстан Ресей құрамына кіретін федеративтік республикаға айналатыны айтылған. Алайда Stopfake.kz мәліметінше, бұл – жалған ақпарат.
ӘБЛЯЗОВТІҢ ҚАНДАЙ ҚАТЫСЫ БАР
Хабарлама наурыз айының соңында тарала бастады. Ал 28 наурызда Мұхтар Әблязов өзінің YouTube арнасында алдағы ҚХА референдумы туралы жазған еді. Оның айтуынша, референдумда «Қазақстанның Беларусь елі секілді Ресейдің одақтас мемлекеті болуға тиіс деген шешім ұсынылады».
-Бұл Қазақстанның болашақта ешбір өкілеттігі жоқ федеративтік республикаға айналуына әкеледі. Оның сөзі – ешқандай дәлелі жоқ ақылға қонымсыз мәлімдеме. Қазақстанда экстремистік ұйым деп танылған «Қазақстанның демократиялық таңдауы» қозғалысының жетекшісі елде бүлік шығармақ, делінген материалда.
ҚХА СЕССИЯСЫ
23-24 сәуірде Қазақстан халқы Ассамблеясының сессиясы өтеді. Бұл туралы 20 наурызда Қасым-Жомарт Тоқаев жария етті. Ақорданың сайтында да, ресми жаңалықтарда да референдум өткізу туралы жазылмаған. ҚХА да мұндай мәлімдемелер жасаған жоқ.
Сонымен қатар, Қазақстан халқы Ассамблеясының референдум шақыра алмайды. «Республикалық референдум туралы» Заңға сәйкес, референдум тағайындау бастамашылығы президентте, үкіметте, парламентте немесе сан жағынан республиканың барлық облыстарын, астанасы мен республикалық маңызы бар қалаларын тең мөлшерде бiлдiретiн республикалық референдумға қатысу құқығы бар екi жүз мыңнан кем емес ел азаматтарында болады. Бұл азаматтар Президентке тілек білдіреді. Референдум тағайындау туралы шешiмдi Мемлекет басшысы ғана қабылдайды.
Референдум туралы хабарламаны Астана ҚХА Медиа-орталығының басшысы Равиль Валеев өзінің Facebook парақшасында жоққа шығарды.
- Қазақстан халқы Ассамблеясының мүшесі және Астана қаласы ҚХА Медиа-орталығының басшысы ретінде әлеуметтік желілерде таратлған жалған ақпаратты жоққа шығару қажет деп санаймын. ҚХА-ның алдағы уақытта өтетін сессиясында референдум өткізу мәселесі қаралады деген ақпаратқа негіз жоқ, бұл өтірік пжәне арандатушылық болып табылады.
Қазақстан халқы Ассамблеясы – бұл қоғамдық келісімді нығайтуға, этностар арасындағы диалогты дамытуға және тәуелсіздік пен аумақтық тұтастық қағидаттарына негізделген мемлекеттік саясатты қолдауға бағытталған конституциялық орган. Мұндай деструктивті ақпараттың мақсаты – сенімсіздік тудыру және қоғамдағы жағдайды тұрақсыздандыру. Азаматтарды арандатушылыққа бой алдырмауға және тек сенімді ақпарат көздеріне ғана ден қоюға шақырамын», – делінген Равиль Валеевтің хабарламасында.
Қазіргі уақытта ашық дереккөздерде ҚХА сәуір айында Ресеймен одақтас мемлекет құру туралы референдум өткізетіндігі расталған жоқ. Демек, таралған ақпарат – фейк.