Оңтүстік Кореяның Конституция соты ел президенті Юн Сок Ёльге импичмент жариялау туралы шешімді құптады, деп хабарлайды Ulysmedia.kz.
Жұма күні Конституция соты Оңтүстік Корея парламентінің президентті қызметінен шеттету жөніндегі өтінішін мақұлдаған. Бұл шешім Юн Сок Ёльдің мемлекет басшысы лауазымынан түпкілікті кететінін білдіреді.
Үкім парламенттің импичмент туралы ұсыныс енгізгенінен 111 күн өткен соң және сот тыңдалымдары аяқталғаннан кейін 38 күн өткенде шығарылды. Бұл – ел тарихындағы осындай істер бойынша ең ұзақ қаралған процес. Мысалы, 2016 жылы бұрынғы президент Пак Кын Хенің импичментіне қатысты соңғы шешім сот отырыстары аяқталғаннан кейін 11 күннен соң қабылданса, 2004 жылы президент Но Му Хёнға қатысты шешімге 14 күн қажет болған еді. Осылайша, Юн Сок Ёль – импичмент арқылы қызметінен кеткен Пак Кын Хеден кейінгі екінші Оңтүстік Корея президенті атанды.
Енді Оңтүстік Кореяда кезектен тыс президенттік сайлау өтеді. Жаңа мемлекет басшысы алпыс күн ішінде, яғни 3 маусымға дейін сайлануы тиіс. Сол уақытқа дейін ел президентінің міндетін премьер-министр Хан Док Су атқарады.
Айта кетейік, наурыз айының соңында Қазақстан президенті Қасым-Жомарт Тоқаев өрт салдарына байланысты Оңтүстік Корея билігіне жеделхат жолдаған болатын.