Дональд Трамптың баж салығы енгізу туралы шешімі жаһандық экономикаға айтарлықтай әсер етуі мүмкін. Сарапшылардың пікірінше, мұндай қадам әлемдік инфляцияны күшейтеді және АҚШ экономикасына да теріс ықпал етеді. Импорттық тауарларға, әсіресе Қытайдан, Еуропадан, Канададан және Мексикадан келетін өнімдерге баж салығы енгізілсе, АҚШ-та баға шарықтауы ықтимал, деп хабарлайды Ulysmedia.kz.
АҚШ-ТА БАҒА ҚАЛАЙ ӨЗГЕРЕДІ?
Сарапшы Мұхтар Тайжан бұны тек АҚШ экономикасына ғана емес әлемге әсер ететін қадам деп бағалады
"Бұл әлемдік инфляцияға апаратын қадам. Әлбетте АҚШ-тың өзінде де инфляция өсіп кетеді. Өйткені импорт әсіресе Қытайдан, Еуропадан, Канададан, Мексикадан. Ол өте маңызды," - дейді Тайжан.
ТРАМПТЫҢ РЕЙТИНГІ ТӨМЕНДЕЙ МЕ?
Сарапшылар баж салығы халықтың әлеуметтік жағдайына да кері әсерін тигізеді деп болжайды. Халықтың кедейленуі және бағаның өсуі Трамптың рейтингінің төмендеуіне алып келуі мүмкін. Бұл өз кезегінде оның қарсыластарының белсенділігін арттыруы ықтимал.
"Халық кедейлікке батып кетеді. Нәтижесінде Трамптың рейтингі төмендейді. Оның нәтижесінде бәлкім Трампқа импичмент жариялануы әбден мүмкін. Әрине, бірден емес. Біраздан кейін. Әсіресе бір жарым жылдан кейін конгресске тағы да бір сайлау өтпек. Егер демократтар ұтып шықса импичменттің болуы әбден мүмкін," - деп пайымдайды Мұхтар Тайжан.
Мұхтар Тайжанның пікірінше мұның арты АҚШ-тың әлемнен оқшаулануына әкеліп соғуы әбден мүмкін.
"АҚШ-тың халықаралық изоляциясының үлкен қадамы. АҚШ-тың әлемдік рөлі азаяды. Бәлкім Біріккен ұлттар ұйымынан шығуы мүмкін. Үлкен жетіліктен де шығуы мүмкін. Кейбір сарапшылар тіпті НАТО-дан шығуы мүмкін деп болжайды."- дейді Тайжан.
БҰҒАН ДЕЙІН
АҚШ Трамптың жаңа сауда саясаты шеңберінде Қазақстаннан әкелінетін тауарларға 27% мөлшерінде баж салығын енгізген.
Жаңартылған тізімге АҚШ-тың жаңа сауда шектеулерін ескеруі тиіс ондаған мемлекет енген. Ең жоғары тарифтер Камбоджаға (49%), Мадагаскарға (47%), Вьетнамға (46%), Шри-Ланкаға (44%) және Мьянмаға (44%) белгіленген. Қазақстан үшін бұл көрсеткіш – 27%.
Сонымен қатар, жаңа тарифтер АҚШ-тың ірі сауда серіктестеріне де әсер етті. Атап айтқанда, Қытайға (34%), Үндістанға (26%), Оңтүстік Кореяға (25%), Таиландқа (36%), Еуропалық одаққа (20%) және Швейцарияға (31%) жаңа баж салығы енгізілді.
Қаржы саласының маманы Расул Рысмамбетов АҚШ президенті Дональд Трамптың жаңа сауда саясатын түсіндіріп, пікір білдірген.