Мәскеу облысы Серпухов қаласында 2004 жылы туған Қазақстан азаматына қатысты қылмыстық іс қозғалды. Жас жігітке қоғамдық көлік аялдамасын қасақана бүлдірді деп айып тағылып отыр, деп хабарлайды Ulysmedia.kz.
МӘН-ЖАЙ
"МК" басылымының мәліметінше, қазақстандық жігіт алкоголь ішіп алып, масаң күйде аялдама әйнегін сындырған.
Оқиға Пушкин көшесінде болған. Тергеу мәліметтері бойынша, жігіт аялдама кешенінің әйнегіне аяғымен теуіп, бір бөлігін сындырған. Зақымдалған нысан "Комбинат благоустройства" балансында тұр. Шығын сомасы – 11 025 рубль.
ТЕРГЕУ
Алғашқы тергеу амалдары кезінде жас жігіт кінәсін толықтай мойындап, алкогольдік масаң күйде болғанын айтты.
"Ол бұзақылық ниетпен, қоғамдық тәртіпті бұзып, қоғамға құрметсіздік танытып, қасақана істеген", - делінген тергеу материалдарында.
Қылмыстық іс РФ Қылмыстық кодексінің 214-бабының 1-бөлігі бойынша қозғалды. Қоғамдық орында жасалған вандализм үшін жас жігітке 40 мың рубльге дейін айыппұл салынып, міндетті немесе түзеу жұмыстарына тартылып, не болмаса үш айға дейін абақтыға қамалуы мүмкін.