USDA Қазақстаннан бидай мен ұнның астық эквивалентіндегі экспорт көлемін 2025/26 жылдары 8 млн тонна деп бағалады. Бұл осы маусымда күтілгеннен 2 млн тоннаға аз, деп хабарлайды Ulysmedia.kz.
USDA – бұл АҚШ ауыл шаруашылығы министрлігі құрған азық-түлік өнімдерінің дерекқоры (ағылш. USDA National Nutrient Database).
Қазақстан бидай одағындағы аналитика департаментінің басшысы Евгений Карабанов өз Telegram-каналында USDA есептеріне қатысты пікір білдірді. Ол көршілес елдерден Қазақстанға қосымша сұраныстың пайда болатынын атап өтті.
КІМ САТЫП АЛАДЫ
USDA болжамы бойынша, Ауғанстанға импорт 4,4 млн тонна (+0,2 млн тонна), Иранға – 2,5 млн тонна (+1,5 млн тонна), Иракқа – 3 млн тонна (+0,7 млн тонна), Пәкістанға – 2 млн тонна (+1,9 млн тонна), Түркияға – 7,5 млн тонна (+4 млн тонна) және Қытайға – 6 млн тонна (+2,7 млн тонна) болады. Евгений Карабановтың пікірінше, алдағы уақытта Түркия мен Қытайға импортқа қатысты болжамдар жоғары бағытта қайта қаралуы мүмкін.
Сонымен қатар, ірі бидай жеткізушілерінің экспорт жөніндегі болжамдары да өсіп отыр. Ауғанстан нарығында Қазақстанның экспортерлері ұн бойынша Өзбекстан мен РФ-мен бәсекелеседі, Иран нарығында – РФ, Украина, Еуроодақпен. Ал Қытайға жеткізілімдер РФ және әлемдік жетекші экспортшылармен жүзеге асырылады. Евгений Карабанов қытай нарығына жемдік ұн жеткізуде Қазақстанның артықшылықтарын атап өтті.
КІМ ӨНДІРЕДІ
2025/26 МГ бойынша USDA жалпы бидай өндіру көлемін 808,521 млн тонна деп болжайды, бұл өткен маусымнан 8,8 млн тоннаға артық. Қытайдағы өндіріс көлемі 142 млн тоннаға (+1,9 млн тонна) жетуі күтілуде. Алайда, Евгений Карабанов бұл бағалауға күмәнмен қарайды, өйткені Хэнань провинциясында құрғақшылық болып жатыр, ал бұл аймақ Қытайдағы бидай өндірісінің 30%-ын құрайды.
Еуроодақта бидай өндіру көлемі 136 млн тонна (+13,9 млн тонна), Үндістанда – 117 млн тонна (+3,7 млн тонна), Ресейде – 83 млн тонна (+1,4 млн тонна), Канаданың – 36 млн тонна (+1 млн тонна), Аргентинада – 20 млн тонна (+1,5 млн тонна), Ұлыбританияда – 13 млн тонна (+2 млн тонна) болады деп болжанады.
Бұған қоса, Австралияда өндіріс көлемі 31 млн тоннаға (-3,1 млн тонна), Пәкістанда – 28,5 млн тоннаға (-2,9 млн тонна), Украинада – 23 млн тоннаға (-0,4 млн тонна), Иранда – 14 млн тоннаға (-2 млн тонна), АҚШ-та – 52,3 млн тоннаға (-1,4 млн тонна) төмендеуі мүмкін.
Қорытындылай келе, Евгений Карабанов Қазақстандағы егіс науқаны жаңа ғана басталғанын, сондықтан Қазақстан мен басқа елдердегі болашақ өнім бойынша болжамдар әлі де қайта қаралуы мүмкін екенін атап өтті.