Ақмола облысында қауіпсіздік техникасының сақталмауы салдарынан ер адам трактор тиегіштің дөңгелегінің астына түсіп, қаза тапты, деп хабарлайды Ulysmedia.kz.
ОҚИҒАНЫҢ МӘН-ЖАЙЫ
Державинск қаласынан екі шақырым жерде Lunking маркалы дөңгелекті трактор тиегішінің қатысуымен қайғылы жол-көлік оқиғасы болды.
Алдын ала мәлімет бойынша, трактор кабинасында бір ғана орын қарастырылғанына қарамастан, жолаушы сүзгі кассеталарының үстіне отырған.
Қозғалыс кезінде ол тепе-теңдікті жоғалтып, жолдың жүру бөлігіне құлап, артқы дөңгелектің астына түсіп қалған.
– Алған жарақатынан ер адам оқиға орнында жан тапсырған, – делінген хабарламада.
ҚЫЛМЫСТЫҚ ІС ҚОЗҒАЛДЫ
Трактор жүргізушісі оқиға кезінде мас болмаған.
Қазіргі таңда бұл факті бойынша Қылмыстық кодекстің 345-бабы 3-бөлігі бойынша сотқа дейінгі тергеу басталды. Трактор арнайы тұраққа қойылып, тергеу амалдары жүргізіліп жатыр.
Еске салайық, бұған дейін 28 мамырда Алматы - Бішкек тасжолында КамАЗ-дың тіркемесі ажырап, жол апаты болғанын жазған едік. Салдарынан төрт адам қаза тапты. Оның ішінде алматылық жас мұғалім де бар.