Президент 104 жасында дүниеден өткен соғыс ардагері Әбдіғали Қаймолдиннің отбасына көңіл айту жеделхатын жолдады, деп хабарлайды Ulysmedia.kz.
КӨҢІЛ АЙТУ
Президент Қасым-Жомарт Тоқаев Ұлы Отан соғысының ардагері, «Халық қаһарманы» Әбдіғали Қаймолдиннің дүниеден өтуіне байланысты оның отбасы мен жақын туыстарына көңіл айтты.
- Әбдіғали Қаймолдин жастай майдан даласына аттанып, ерен ерлігімен жеңісті жақындатуға зор үлес қосқан батыр тұлға болды. Бейбіт кезеңде мемлекеттік және қоғамдық істерге белсене араласып, ел игілігі жолында ұзақ жыл қызмет етті. Ғасыр жасап, соңына өнегелі жол қалдырған Әбдіғали Қаймолдиннің жарқын бейнесі мен есімі ұмытылмайды. Иманы саламат, жаны жаннатта болсын, – деп жазылған жеделхатта.
ӘБДІҒАЛИ ҚАЙМОЛДИН
Әбдіғали Қаймолдин 1921 жылғы 30 маусымда Семей облысы Абыралы ауданы Ұзынбұлақ ауылында дүниеге келген. 1941 жылы жас кезінде әскер қатарына шақырылып, майданға аттанып, Сталинград, Украина, Беларуссия және Балтық өңірлеріндегі шайқастарға қатысқан.
Ол артиллерист-қарауылшы ретінде қызмет етіп, соғыста төрт мәрте жараланған.
Соғыстан кейін Әбдіғали Қаймолдин Кеңес әскери қызметтік органдарында және мемлекеттік басқарма саласында еңбек етті. Оның ішінде Семей қаласы мен аудандардағы атқарушы комитеттерде, сондай-ақ «Түрксіб» совхозының партия комитетінің хатшысы қызметін атқарған кезеңдері бар.
Әбдіғали Қаймолдин бірнеше марапаттарға ие: «Қызыл жұлдыз», «Ұлы Отан соғысы» ордендері, «Жауынгерлік еңбегі үшін», «Кёнигсбергті алғаны үшін» және Ұлы Отан соғысы жеңісіне арналған медальдар.
2023 жылы 5 мамырда Қазақстан президентінің жарлығымен оған «Халық қаһарманы» атағы берілді, осы атақпен бірге «Отан» ордені мен «Алтын жұлдыз» төсбелгісі тапсырылды.