«Астана» халықаралық қаржы орталығында Zhetysu Gold Limited атты жаңа алтын өндіру компаниясы тіркелді. Оның иелері — ұлттық компания «Тау-Кен Самұрық» және Кеңес Рақышевтің Treasure Limited компаниясы, деп хабарлайды Ulysmedia.kz.
Алтын нарығындағы жаңа ойыншы
Zhetysu Gold Limited бағалы металдарды, ең алдымен алтынды өндірумен айналыспақ. Компанияны 19 қарашада Астанада, «Сулы-Жасыл бульвар» бизнес орталығында тіркеген. Жаңа кәсіпорынның жарғылық капиталы — 50 млн теңге.
Бірінші құрылтайшы — Қазақстанда алтын, мыс, қорғасын-мырыш кен орындарын игерумен айналысатын ұлттық тау-кен компаниясы «Тау-Кен Самұрық». Екінші құрылтайшы — Treasure Limited. Бұл компанияны 2025 жылдың қыркүйегінде «Астана» халықаралық қаржы орталығында Кеңес Рақышев тіркеген. Treasure Limited — бизнесменнің өзге активтерін басқаратын холдингтік ұйым.
Жаңа алтын өндіруші компанияның бас директоры болып Кирилл Довганюк тағайындалды. Ол Treasure Limited-ті де басқарады. Бұған қоса ол алматылық «EW Tech» ЖШС-ін басқарған және бұған дейін «Сарыарқа Mining» компаниясын жетекшілік еткен. Компания директорлары құрамында «Тау-Кен Самұрық» жобалар департаментінің директоры Диана Мосендз және «Fincraft Resources» АҚ топ-менеджері Румия Сәгітова да бар.
Рақышев туралы
Кеңес Рақышев — Қазақстандағы ең ықпалды әрі ауқатты кәсіпкерлердің бірі. Forbes ұлттық рейтингінде ол 435 млн долларлық байлығымен 23-орында тұр.
Кеңес Рақышев Fincraft Group холдингіне иелік етеді. Холдинг арқылы ол бірқатар мұнай өндіруші кәсіпорындардағы үлестерді басқарады. Оның негізгі активтерінің қатарында — «Fincraft Resources» АҚ және «БТА Банк».