Қытайдың Xiamen Wanli Stone Co., Ltd компаниясы Жамбыл облысындағы молибден-уран кен орнын барлау жобасына 1,8 млн доллар инвестиция салмақ, деп хабарлайды Ulysmedia.kz.
Мәселе уранда ма?
Бұл мәміле туралы қаржы сарапшысы Арман Батаев Finmentor.kz телеграм-арнасында Қытай қор биржасының сайтында жарияланған шешімге сілтеме жасап жазды. Оның айтуынша, Xiamen Wanli Stone құрылымына кіретін қытайлық компаниялар Hainan Zhong-Kazakh Wanli Stone Mining Co. атты бірлескен кәсіпорын құрып, 1,8 млн долларға қазақстандық «Спецпоставка — Абсолют» ЖШС-ін сатып алады.
«Спецпоставка — Абсолют» ЖШС-нің Жамбыл облысында сирек, түсті және бағалы металдарды барлауға берілген лицензиясы бар.
— Мәміленің негізгі активі – Қордай молибден-уранды полиметалл кен орны. Оны дамыту және өнеркәсіптік өндіріске енгізу жоспарланып отыр, — деп атап өтті Арман Батаев.
Компаниялар туралы не белгілі?
«Спецпоставка — Абсолют» ЖШС 20 жылдан астам уақыттан бері жұмыс істеп келеді, Алматы қаласында шағын кәсіпорын ретінде тіркелген. Құрылтайшылары – Ирина Голубь пен Антон Меркулов. Ресми анықтамада негізгі қызмет түрі ретінде «бағдарламалық қамтамасыз етуді сүйемелдеу» көрсетілген.
Ал Xiamen Wanli Stone – 1996 жылы Қытайдың Сямынь қаласында құрылған компания. Ол Қазақстандағы ең ірі тас өндірушілердің бірі саналады: компанияның жеті карьері мен алты өңдеу зауыты бар, оның ішінде Оңтүстік Африкада да кәсіпорындары жұмыс істейді. Өнімдерін 20-дан астам елге экспорттайды. Xiamen Wanli Stone өндірген тас әуежайлар, қонақүйлер, кеңсе ғимараттары мен теміржол вокзалдарын салуда қолданылады.