Британдық ғалымдар менопауза кезінде әйелдердің миында Альцгеймер ауруына тән өзгерістер байқалатынын анықтады. Есте сақтау мен эмоцияға жауап беретін аймақтардағы сұр заттың азаюы әйелдердің ерлерге қарағанда деменцияға бейім болуын ішінара түсіндіреді деп есептейді зерттеушілер, деп хабарлайды Ulysmedia.kz.
ТОЛЫҒЫРАҚ
BBC жазуынша бұл зерттеу деректері шамамен 125 мың әйелге негізделген, олардың ішінде 11 мыңға жуық адамға миға магниттік-резонанстық томография (МРТ) жасалған.
ЗЕРТТЕУ НӘТИЖЕЛЕРІ
Psychological Medicine ғылыми журналында жарияланған мақалада гормондық алмастыру терапиясы (ГАТ) сұр заттың жоғалуын тоқтатпайтыны атап өтілген.
«Менопауза кезінде өзгерістер Альцгеймер ауруы кезінде зақымданатын ми аймақтарында жүреді. Бұл әйелдерді болашақта әлдеқайда осал етуі мүмкін. Әрине, бұл жалғыз түсініктеме емес, бірақ біз неге әйелдер арасында деменция жағдайлары ерлерге қарағанда екі есе көп екенін түсінуге көмектеседі», – дейді зерттеудің жетекші авторы Кембридж университетінің профессоры Барбара Саакян.
МИ АЙМАҚТАРЫНДАҒЫ ӨЗГЕРІСТЕР
Ақ және сұр зат – ми мен жұлынның ең маңызды құрамдас бөліктері. Сұр зат нейрондар мен олардың дендриттерінен тұрады. Дендрита – көрші нейрондармен байланыс орнататын қысқа тармақтар.