Қазақстан қор биржасында доллар бағамы өсті. Бір күнде АҚШ валютасы 3 теңгеден астам қымбаттады. Сарапшылар мұны бизнес тарапынан долларға деген сұраныстың артуымен байланыстырады. Енді нарық қатысушылары АҚШ Федералдық резерв жүйесінің шешімін күтіп отыр. Ол доллар бағамының алдағы бағытына әсер етуі мүмкін, деп хабарлайды Ulysmedia.kz.
Теңгеге қысым күшейді
Сейсенбідегі күндізгі сауда қорытындысы бойынша доллар бағамы 455,63 теңгеге жетті. Бір сауда сессиясында АҚШ валютасы 3,52 теңгеге қымбаттады.
Қазақстан қаржыгерлер қауымдастығының (ҚҚҚ) болжамынша, компаниялар шетелден жеткізілетін тауарлардың ақысын төлеу және қарыздарын өтеу үшін долларды белсендірек сатып ала бастаған. Нәтижесінде нарықта доллар сатушыларға қарағанда сатып алушылар көп болды.
– Мұнай бағасының төмендеуі мен доллар индексінің өсуі де қосымша қысым жасауы мүмкін, – деп атап өтті ҚҚҚ сарапшылары.
Бұл уақытта Brent маркалы мұнайдың бір баррелі 109,4 долларға дейін арзандады. Бұған Иран мен АҚШ арасындағы соғысты тоқтатудың ықтимал шарттары талқыланып жатқан Таяу Шығыстағы жаңалықтар себеп болды. Инвесторлар мұны тараптардың келіссөздерге жақындай түсуі мүмкін деген белгі ретінде қабылдады.
Мұнай бағасының төмендеуі Қазақстан үшін маңызды. Өйткені шикізат экспорты елге валюталық түсім әкелетін негізгі көздердің бірі саналады.
Нарық ФРЖ шешімін күтіп отыр
Инвесторлар енді АҚШ Федералдық резерв жүйесінің шешіміне назар аударып отыр. Қыркүйекте АҚШ-та базалық мөлшерлеме 3,75-4% деңгейіне дейін көтерілген еді. Бұл жолы нарық қатысушыларының басым бөлігі мөлшерлеме тағы өседі деп күтпейді. Оның көтерілу ықтималдығы небәрі 7% деп бағаланып отыр.
Дегенмен мөлшерлеме өзгеріссіз қалған күннің өзінде, ФРЖ өкілдерінің мәлімдемелері нарыққа әсер етуі мүмкін. АҚШ реттеушісі инфляцияны тежеу үшін алдағы уақытта ақша-несие саясатын одан әрі қатаңдатуға тура келетінін аңғартуы ықтимал.
– Мөлшерлемені тағы көтеру мүмкіндігі туралы сигналдар нарыққа қысымды күшейтуі мүмкін, – деп ескертті ҚҚҚ сарапшылары.
Инвесторлар шешімді күтіп отырған кезде доллардың әлемдік нарықтағы бағамы да нығайып келеді. Доллар индексі 0,4% өсіп, 102,3 пунктке жетті.
Қазақстан қор нарығындағы сауда аздаған өсіммен аяқталды. KASE индексі 0,4%-ға көтерілгенімен, мәмілелер көлемі айтарлықтай қысқарды.
Валюта бағамдарының алдағы өзгерісі ФРЖ шешіміне және әлемдік нарықтардың америкалық реттеуші мәлімдемелеріне қалай жауап беретініне де байланысты болады.