Алматыда прокуратура ұлттық университет ғимаратының бір бөлігін мемлекетке қайтарды, деп хабарлайды Ulysmedia.kz.
ТОЛЫҒЫРАҚ
Алматы прокуратурасы Қазақ ұлттық қыздар педагогикалық университеті ғимаратының 208 шаршы метр бөлігі заңсыз жекешелендірілгенін анықтады.
Прокуратураның талап-арызы бойынша сот, жасалған мәмілелерді жарамсыз деп таныды. Сот актісі заңды күшіне енді.
Мемлекеттік мүлік және жекешелендіру саласындағы уәкілетті орган қайтарылған активке бағалау жүргізіп жатыр.
– Мемлекеттік мүлікті пайдалану және иеліктен шығарудың заңдылығын қадағалау, Алматы қаласы прокуратурасының жіті бақылауында, - делінген хабарламада.
Еске салайық, бұған дейін ғылым және жоғары білім министрі Саясат Нұрбек тоқсаныншы жылдары жабайы жекешелендіру аясында бірнеше универсиеттің оқу корпустары, жатақханалары жекешелендіріліп кеткенін айтқан еді.