Жамбыл облысында нағыз триллерге ұқсас, бірақ өмірде болған оқиға сотта қаралды. Ресми түрде қайтыс болды деп танылған әйел бір айдан кейін үйіне тірі оралған, деп хабарлайды Ulysmedia.kz.
Жоғалу және жерлеу
Оқиға 2024 жылдың тамызында басталған. 71 жастағы әйел Тараз қаласына, әпкесінің үйіне кеткеннен кейін байланысқа шықпай қалады. 2025 жылы Құрбан айттан соң туыстары оның жоғалғанын полицияға хабарлап, қылмыстық іс қозғалған.
Араға бір жыл салып, 2025 жылдың тамызында ауыл маңындағы егістіктен әйел адамның мәйіті табылған. Марқұмның қызы мен немересі оны жоғалған туыстары деп таныған. Соның негізінде өлім туралы акт жазбасы рәсімделіп, тиісті куәлік берілген. Әйел жерленіп, барлық құжаттық рәсімдер жабылған. Туыстары бұл оқиғаны қайғылы болса да аяқталды деп ойлаған.
Алайда 2025 жылдың қыркүйегінде «марқұм» күтпеген жерден Жамбыл ауданына қарасты Қостөбе ауылындағы ағасының үйіне тірі келген.
«Марқұмның» қайта оралуы
Сотта әйел Құрбан айттан кейін Айша бибі ауылына барып, маусымдық жұмысқа — пияз жинауға орналасқаны анықталған. Ол әріптесінің үйінде тұрып, туыстарымен байланысқа шықпаған.
Қызының айтуынша, анасы бұрын да туыстарына немесе жұмыс іздеп кенеттен кетіп, ұзақ уақыт хабарсыз жүретін әдеті болған. Өзінің «қайтыс болғанын» әйел тек зейнетақысы тоқтап қалған соң білген. Себебін анықтау үшін Таразға келгенде, оған ресми құжаттар бойынша қайтыс болғаны айтылған.
Осыдан кейін қызы сотқа жүгініп, анасының өлімі туралы жазбаны жоюды және құқықтық мәртебесін қалпына келтіруді сұраған.
Сот «өлімді» жоққа шығарды
Сот барысында егістіктен табылған мәйіт басқа адам екені анықталды. Полиция эксгумация жүргізіп, қайта сот-медициналық және генетикалық сараптама тағайындаған. Нәтижесінде марқұмның жеке басы нақты анықталып, қылмыстық іс тоқтатылған.
Сот өлім туралы куәлікті жарамсыз деп танып, акт жазбасын жойды. Шешім заңды күшіне енді.