Қазақстанның 2030 жылға дейінгі жаңартылған Сыртқы саясат тұжырымдамасында Нұрсұлтан Назарбаев пен оның Елбасы мәртебесі туралы тікелей айтылған тұстар алынып тасталды, деп хабарлайды Ulysmedia.kz.
Назарбаев туралы сабақтастық жөніндегі тұжырым алынып тасталды
14 тамызда президент Қасым-Жомарт Тоқаев Қазақстанның 2020-2030 жылдарға арналған Сыртқы саясат тұжырымдамасына өзгерістер енгізу туралы жарлыққа қол қойды. Өзгерістердің бірі сыртқы саясат бағытының сабақтастығына қатысты тұжырымдарға байланысты.
Құжаттың бұрынғы нұсқасында сыртқы саясаттың негізгі қағидаттарының қатарында «ел дамуының жаңа кезеңіндегі Қазақстан Республикасының Тұңғыш Президенті – Елбасы Н.Ә. Назарбаевтың сыртқы саяси бағытының сабақтастығы» деген тұжырым болған.
Енді бұл сөйлем қысқартылды. Жаңа редакцияда тек «ел дамуының жаңа кезеңіндегі сыртқы саяси бағыттың сабақтастығы» деп көрсетілген.
Осылайша, құжаттан сыртқы саясат бағытын Тұңғыш Президенттің есімімен байланыстыратын тұс алынып тасталды.
Назарбаевтың сыртқы саясат жөніндегі бастамалар көтеру құқығы да жоқ
Жаңа редакциядан Тұңғыш Президент – Елбасы туралы конституциялық заңға қатысты жеке абзац та алынып тасталды.
Бұған дейін тұжырымдамада Назарбаевтың «тарихи миссиясына» байланысты өмір бойы халыққа, мемлекеттік органдар мен лауазымды тұлғаларға сыртқы саясаттың маңызды мәселелері бойынша бастамалар ұсынуға құқығы бар екені жазылған еді.
Енді бұл норма құжатта жоқ.
Өзгерістер Қазақстанның сыртқы саяси бастамаларын халықаралық деңгейде ілгерілетуге арналған алаңдарға да қатысты. Бұрын құжатта Астана экономикалық форумы, Еуразиялық медиа форум және Astana Club аталған болса, жаңа редакцияда олардың орнына тек Астана халықаралық форумы қалдырылған.
Тағы бір өзгеріс мемлекеттік құрылымға қатысты. Жаңартылған құжатта Қазақстанның заң шығарушы билікті жүзеге асыратын жоғары өкілді органы ретінде Құрылтай туралы тұжырым пайда болды.
Президенттің жарлығы қол қойылған күннен бастап күшіне енді.