Абай облысында студент қыздың өліміне қатысты сот отырысынан журналистер шығарылды. «НеМолчи» қоры судьяны соттың ашық өту қағидатын бұзды деп айыптап, Жоғарғы сотқа жүгінді, деп хабарлайды Ulysmedia.kz.
Қордың мәліметінше, судья мен прокурор айыпталушының ата-анасының өтінішін ескеріп, БАҚ өкілдерін сот залынан шығарған. Ал сот отырысы ашық өткен.
— Біз мұны соттың ашық болу қағидатын өрескел бұзу деп санаймыз. Журналистерге сотталушының жүзін жариялауға тыйым салуға болады, бірақ оларды сот залынан шығаруға болмайды, — деп мәлімдеді қор.
«НеМолчи» Қылмыстық-процестік кодекстің 29-бабына сәйкес соттың ашық болуы тек заңда нақты көрсетілген жағдайларда және соттың уәжді қаулысы негізінде шектеуге болатынын еске салды. Айыпталушы туыстарының жайсыздануы мұндай негізге жатпайды.
Қор Жоғарғы соттың қылмыстық істер жөніндегі сот алқасының төрайымы Назгүл Рахметуллинаға жүгініп, судья Хасенбаевтың әрекетіне құқықтық баға беруді сұрады.
Дильназдың ісі туралы не белгілі?
20 жастағы Дильназ Сабыржанқызы Семейдегі Шәкәрім университетінде «Тарих және география» мамандығында оқыған. Ол үшінші курсқа көшкелі жүрген.
2026 жылғы 13 шілдеге қараған түні Дильназ Абай облысының Бородулиха ауылында бұрынғы жігітімен кездескен.
Екеуінің арасында жанжал шыққан.
Айыптау нұсқасы бойынша, Дильназ жігітке шапалақ берген, ал ол жауап ретінде ұрған.
Содан кейін алдын ала дайындап қойған жиналмалы пышағын алып, қыздың мойын тұсынан ұрып, артериясына зақым келтірген.
Дильназ құлағаннан кейін де ол пышақпен желкесіне, мойнына және арқасына бірнеше рет соққы жасаған.
Сот-медициналық сараптама денесінен барлығы 16 жарақат анықтаған. Бұған дейін БАҚ-та 12 жарақат туралы айтылған еді.
Сараптама бас сүйегінің сынғанын және басқа да дене жарақаттарын анықтаған. Кісі өлтіргеннен кейін күдікті ізін жасыруға тырысқан. Ол мәйітті жол бойымен сүйреп апармақ болған, бірақ алысқа жеткізе алмай, көшеде қалдырған.
Таңғы сағат алты шамасында балық аулауға бара жатқан жергілікті тұрғын мәйітті тауып алған.
Істің саралануы және қысым
16 пышақ жарақаты мен бас сүйегінің сынғанына қарамастан, айып тек Қылмыстық кодекстің 99-бабы 1-бөлігі — «Адам өлтіру» бойынша тағылған.
Прокуратура да, тергеу де бұл істен аса қатыгездік белгісін көрмеген.
Дильназдың ата-анасы істі ауырлау баппен саралауды талап етіп отыр.
— Дильназ көп пышақ жарақатынан қаза тапты. Оның бүкіл өмірі алда еді. Ол менің жалғыз балам, үмітім әрі тірегім болатын. Осы іске бейжай қарамай, қоғам назарын аударуларыңызды сұраймын, — деген марқұмның анасы.
«НеМолчи» қоры тағы бір жайтқа назар аударды. Күдіктінің ата-анасы Дильназдың туыстары қызының қаза болғаны туралы ашық айтқаны үшін олардың үстінен арыз жазған.