Президент Қасым-Жомарт Тоқаев барлық деңгейдегі мәслихаттардың өкілетін мерзімінен бұрын тоқтату туралы жарлыққа қол қойды. Құжат жарияланған сәттен бастап күшіне енді, деп хабарлайды Ulysmedia.kz.
Орталық сайлау комиссиясына барлық деңгейдегі мәслихат депутаттарының кезектен тыс сайлауын тағайындау, оған дайындық жұмыстарын жүргізу және сайлауды өткізу тапсырылды.
Шешім қалай қабылданды?
Тоқаев жарлыққа премьер-министр Олжас Бектеновпен және Құрылтай төрағасы Айбек Дәдебаймен конституциялық консультациялар өткізген күні қол қойды.
Президент таңертең түпкілікті шешімді Конституцияға сәйкес және айтылған пікірлерді ескере отырып қабылдайтынын мәлімдеген еді. Консультациялар Ата заңның осы рәсімді көздейтін 88-бабына сәйкес өтті.
Тоқаев депутаттар құрамының жаңаруы жергілікті билік органдарының жұмысын күшейтетінін атап өтті. Бұған дейін ол алдағы сайлауды мемлекеттік басқару жүйесін өзгерту үдерісінің қорытынды кезеңі деп атаған болатын.
Мәслихаттар не себепті таратылды?
Мәслихат депутаттарының басым бөлігі Amanat партиясынан сайланған. Маусым айында партия «Әділет» партиясына қосылып, дербес жұмысын тоқтатты. Осыдан кейін депутаттар корпусының заңдылығына қатысты мәселе туындады.
24 қыркүйекте Тоқаев консультациялар өткізіп, мәслихаттарды тарату туралы жарлыққа қол қоятынын мәлімдеген еді. Енді дауыс беру күнін Орталық сайлау комиссиясы белгілеуі керек.
Мәслихаттар қандай орган болды?
Мәслихат депутаттары бес жыл мерзімге аралас жүйе бойынша сайланды: депутаттардың жартысы партиялық тізіммен, қалған жартысы бірмандатты округтерден сайланды. Барлық ірі қалада Amanat партиясы басымдыққа ие болды.
Назарбаев Университеті жанындағы Ұлттық талдау орталығының саясаттанушысы Расул Қоспановтың мәліметінше, Астана, Алматы және Шымкент мәслихаттары саяси бәсекелестік алаңынан гөрі, қаладағы элиталар арасындағы үйлестіру тетігі ретінде жұмыс істеген.
– Саясатқа қол жеткізу мәртебе мен қалыптасқан жүйеге кірігуге байланысты болғанша, мәслихаттар басқарылатын өкілдік моделін қайталай береді, – деген еді Қоспанов.