Ауа температурасы -10 градусқа дейін төмендейді: қай өңірлерінде күн күрт суытады?

Қай өңірлерде күн қатты суытады?

Жетісу облысында суық күтіледі. Түнде өңірде ауа температурасы -5…-10 градусқа, ал Талдықорғанда -8…-10 градусқа дейін төмендейді.

Жамбыл облысында -3…-8 градус, Таразда -5…-7 градус аяз болады деп болжанып отыр.

Алматы облысында түнде ауа температурасы -1…-6 градусқа дейін төмендейді. Алматы мен Қонаевта -2…-4 градусқа дейін үсік жүреді.

Қызылорда облысының солтүстігі мен орталығында ауа температурасы -3 градусқа дейін төмендейді.

Түркістан облысында да үсік күтіледі. Шымкент пен Түркістанда түнде топырақ бетінің температурасы -2 градусқа дейін төмендейді.

Қай жерлерде шаңды дауыл тұрып, қатты жел соғады?

Елдің батысы мен оңтүстігінде ауа райы қолайсыз болады деп күтіледі.

Маңғыстау облысының батысында, солтүстігі мен орталығында шаңды дауыл тұрады. Желдің жылдамдығы секундына 15–20 метрге дейін күшейеді.

Атырау облысының батысы мен оңтүстігінде күндіз шаңды дауыл күтіледі. Желдің екпіні секундына 20 метрге жетеді.

Қызылорда облысының кей жерлерінде жел секундына 23–28 метрге дейін күшейеді. Өңірдің солтүстігі, шығысы мен орталығында, соның ішінде Қызылорда қаласында шаңды дауыл тұрады деп болжанып отыр.

Түркістан облысында да шаңды дауыл күтіледі, желдің екпіні секундына 28 метрге жетеді. Шымкент пен Түркістанда желдің жылдамдығы секундына 15–20 метрге дейін күшеюі мүмкін.

Елдің оңтүстік-шығысында да қатты жел соғады. Жетісу облысында, әсіресе Алакөл көлдері маңында желдің екпіні секундына 23–28 метрге жетуі ықтимал.

Жамбыл облысында жел секундына 23–28 метрге, Алматы облысында 17–22 метрге дейін күшейеді. Қонаевта күндіз желдің екпіні секундына 18 метрге жетеді деп болжанып отыр.

Қай өңірлерде тұман түседі?

Түнде және таңертең Батыс Қазақстан, Ақмола, Шығыс Қазақстан, Солтүстік Қазақстан, Павлодар, Қостанай және Абай облыстарында тұман күтіледі.

Орал, Өскемен және Петропавлда тұманнан айнала нашар көрінуі мүмкін. Жамбыл және Жетісу облыстарының таулы аудандарына да тұман түсуі ықтимал.

Түнгі үсікке қарамастан, бірқатар өңірде табиғи өрт қаупі әлі де жоғары.

Атырау және Қызылорда облыстарында, сондай-ақ Маңғыстау мен Жетісу облыстарының кей аудандарында төтенше өрт қаупі жарияланды.

Батыс Қазақстан, Қостанай, Түркістан облыстарында және Жамбыл облысының жекелеген аудандарында өрт қаупі жоғары болып қала береді.

Ақтауда жоғары, ал Атырау мен Қызылордада төтенше өрт қаупі сақталады.