Ормуз бұғазы маңында танкерге жасалған шабуылдан кейін төгілген мұнай БАӘ жағалауына жетті. Мұнай дағы жағажайларға дейін жайылып, ұзындығы 35 шақырымнан асты. Билік жағалаудың бір бөлігін жауып, тазарту жұмыстарын бастады, деп хабарлайды Ulysmedia.kz.
Мұнай 9 қазанда шабуылға ұшыраған танкер зақымданғаннан кейін тарала бастаған. Болжам бойынша, бұл – Gem No.2 танкері. Спутниктік суреттерді зерттеген BBC Verify журналистері мұнай ағуының алғашқы белгілері 19 қазанда байқалғанын анықтады.
Бірнеше күннің ішінде мұнай дағы едәуір ұлғайып, БАӘ жағалауына жеткен. Әсіресе Умм-әл-Кайвайн қаласы маңындағы жағажайлар қатты ластанған. Жарияланған видеолардан мұнайдың жағаға шығып, жағалаудағы судың қарайып кеткенін көруге болады.
БАӘ-нің Климаттың өзгеруі және қоршаған орта министрлігі мамандар мұнайдың әрі қарай таралуын тоқтату үшін төгіндіні оқшаулауға кіріскенін хабарлады.
Ғалымдар мұнайдың теңіз экожүйесіне елеулі зиян келтіруі мүмкін екенін ескертеді. Ол балықтарға, тасбақалар мен теңіз құстарына қауіпті.
Мұнай балықтардың желбезегін зақымдап, құстардың қауырсындарын жауып қалады және жануарлардың қырылуына әкелуі мүмкін. Улы заттар қоршаған ортада ұзақ сақталып, теңіз жануарларының көбеюіне де кері әсер етуі ықтимал.
– Қоршаған ортаға зиян келмей қоймайды, – деді Шарджа теңіз ғылыми зерттеулер орталығының директоры, профессор Стив Уиддикомб.
Әзірге мамандар шығынның толық көлемін бағалай алмай отыр. Көп нәрсе төгілген мұнайдың мөлшері мен құрамына және ластанған аумақтардың қаншалықты жылдам тазартылатынына байланысты.
Мұнай дағының Синия аралы мен Хор-әл-Бейдаға қарай таралуы ерекше алаңдаушылық туғызып отыр. Бұл жерлерде маржан рифтері, теңіз шөбі өскен алқаптар және сирек кездесетін жануарлардың мекені бар. Олардың арасында жасыл тасбақалар мен жойылып кету қаупі төнген гитара тәрізді скаттар да кездеседі.
Теңіз қауіпсіздігі жөнінде ақпарат жинайтын Vanguard компаниясының мәліметінше, 9 қазанда Әл-Жазира-әл-Хамра елді мекені маңында Панама туымен жүзген танкерге белгісіз снаряд тиіп, кеме зақымданған.
Кемеде өрт шығып, кейін сөндірілген. Интернетте тараған кадрларда теңізшілердің палубада жүгіріп, құтқару кеудешелерін киіп жатқаны көрінеді. Ал кемеден қою қара түтін көтеріліп жатыр.
Иранның мемлекеттік ақпарат құралдары да өртенген танкердің видеосын жариялаған. Олардың мәлімдеуінше, кеме Ормуз бұғазынан рұқсат етілмеген әрі қауіпті бағытпен шығуға тырысқан.
Экипаждағы 22 адамның бәрі құтқарылған. Олардың барлығы – Үндістан азаматтары. Бұл туралы 11 қазанда Үндістанның Дубайдағы консулдығы хабарлады.
Қазан айының басында Ормуз бұғазы мен оған іргелес суларда сауда кемелеріне шабуыл жасалғаны туралы хабарлар саны рекордтық деңгейге жеткен.
BBC тілдескен сарапшылар мұны АҚШ-пен текетірес жағдайында Иранның аса маңызды теңіз жолын бақылауын күшейтуге ұмтылуымен байланыстырады.
АҚШ әскері сауда кемелерін бұғаз арқылы алып өтсе, Тегеран олардың аймақтағы ықпалын шектеуге тырысып жатыр. Қақтығыс барысында коммерциялық кемелерге Иран тарапынан да, америкалық күштер тарапынан да соққы жасалған.
Тамызда Иранның Кешм аралының жағалауы да ірі мұнай төгіндісінен зардап шеккен еді. Сол кезде мамандар теңіз жануарларына, қорғалатын табиғи аумақтарға және жергілікті балықшыларға қауіп төнгенін ескерткен.