Қорғаныс министрлігіндегі тексеру қорытындысы бойынша құқық қорғау органдары 37 қылмыстық істі қарастырып жатыр. Президент Қасым-Жомарт Тоқаевтың тапсырмасымен құрылған комиссия ведомствоның 104-тен астам нысанын тексерді, деп хабарлайды Ulysmedia.kz.
Мән-жай
Қауіпсіздік кеңесінің мәліметінше, анықталған заңбұзушылықтардың бірқатары бойынша сотқа дейінгі тергеп-тексеру басталған. Алайда тергеу мүддесіне байланысты істердің егжей-тегжейі әзірше жарияланбайды.
– Комиссия әскердегі қауіпсіздік пен әскери қызмет жағдайын, сарбаздардың тамақтануын, киім-кешекпен және медициналық көмекпен қамтамасыз етілуін, сондай-ақ мемлекеттік мүліктің сақталуын тексеріп жатыр, – делінген Қауіпсіздік кеңесінің хабарламасында.
Ведомствоның бюджет қаражатын қаншалықты тиімді жұмсағанына қатысты аудит әлі жалғасып жатыр. Тексеру қараша айында аяқталады. Комиссияның қорытындылары әскери реформаны әзірлеу кезінде ескеріледі.
Контекст
Еске салайық, Қорғаныс министрлігін тексеру Каспий теңізіндегі оқу-жаттығу кезінде 14 әскери қызметшінің қаза табуынан кейін басталды. Қорғаныс министрі Дәурен Қосанов қызметінен босатылып, Әскери-теңіз күштерінің бұрынғы бас қолбасшысы қызметіне салғырт қарады деген күдікпен қамауға алынды.
Қазан айында Қауіпсіздік кеңесі әскери реформаның жоспарын мақұлдады. Оған сәйкес, мерзімді әскери қызмет екі кезеңнен тұрады. Сондай-ақ армия құрамында Ұшқышсыз жүйелер әскерлері құрылады.