Еуропаның бірнеше елінде телеарналарға ғимараттарды жарып жібереміз деген қоқан-лоқы хаттар келіп түсті. Осыған байланысты қызметкерлер қауіпсіз жерге көшіріліп, кей телеарналар хабар таратуды уақытша тоқтатуға мәжбүр болды. Кейін жарылғыш зат қойылғаны туралы хабарламалардың жалған екені анықталды. Ал хаттарды жібергендер «Михаил Андропов» деген есімді пайдаланған, деп хабарлайды Ulysmedia.kz.
6 қарашада Ирландия, Ұлыбритания және Болгариядағы телеарналардың редакцияларына жарылыс қаупі туралы хаттар жіберілген. Reuters агенттігінің мәліметінше, олардың қатарында Ирландияның RTE телерадиокомпаниясы, Ұлыбританияның Sky және Болгарияның Nova телеарналары бар.
Белгісіз адамдар ғимараттарға жарылғыш зат қойылғанын және оның жақын арада іске қосылатынын айтып қорқытқан.
«Біз туралы бүкіл әлем білгенін қалаймыз. Сондықтан адамдарымыздың бірі ғимараттарыңызға жарылғыш зат орнатты. Ол 45 минуттан кейін жарылады. Уақыт кетті», – делінген RTE мен Nova редакцияларына келген хаттарда.
Қоқан-қыту хабарламаларынан кейін қызметкерлер ғимараттардан шығарылып, барлық бөлме тексерілген. Алайда еш жерден жарылғыш зат табылмаған.
Жарылыс туралы хабарламалар редакциялардың жұмысына да әсер еткен. Атап айтқанда, Ирландияның RTE телеарнасы әдеттегі бағдарламаларын уақытша тоқтатып, олардың орнына музыка мен алдын ала жазылған хабарламаны эфирге шығарған.
Reuters мәліметінше, кейбір телеарналар үш сағатқа дейін хабар тарата алмаған.
Әзірге жаппай қоқан-лоқы хаттарын кім жібергені белгісіз.
Дегенмен журналистер RTE мен Nova редакцияларына жолданған хаттарға «Михаил Андропов» деген адамның аты-жөні қойылғанын анықтаған.
Reuters агенттігі бұл тектің кезінде КОКП Орталық комитетінің бас хатшысы болған Юрий Андроповтың тегімен сәйкес келетініне назар аударды.
Алайда хат жіберушінің нақты кім екені немесе оның Ресеймен байланысы бары туралы ешқандай дәлел жоқ.
Осыған ұқсас жағдай бір күн бұрын да тіркелген. Еуропа елдері арасында қатынайтын кемінде 19 әуе рейсіне жарылғыш зат қойылғаны туралы жалған хабарламалар түскен.
Қоқан-лоқы Австрия, Бельгия, Болгария, Испания, Италия және басқа да елдермен байланысты рейстерге қатысты болған.
Соның салдарынан кейбір ұшақтар бағытын өзгертіп, басқа әуежайларға қонуға мәжбүр болған.
Мәселен, Aer Lingus әуе компаниясының Дублиннен Римге бағыт алған ұшағы Франциядағы Парижден шамамен 100 шақырым жерде орналасқан әскери әуеайлаққа шұғыл қонған.
Тексеру барысында ұшақтардың ешқайсысынан жарылғыш зат табылмаған.
Ирландия премьер-министрі Михол Мартин арнайы қызметтер телеарналар мен әуе рейстеріне жасалған қоқан-лоққылардың өзара байланысы бар-жоғын әзірге анықтай алмағанын мәлімдеді.
Оның айтуынша, мұндай әрекеттер шынайы жарылыс қаупі болмаса да, адамдардың күнделікті тыныс-тіршілігін айтарлықтай бұзуы мүмкін.
«Бұл жағдай осындай тосын әрекеттер арқылы қоғамның қалыпты тіршілігін бұзып, жұртты дүрліктірудің қаншалық оңай екенін көрсетеді. Мұндағы мақсат – бейберекеттік туғызып, адамдардың бойына үрей мен алаңдаушылық ұялату», – деді Мартин.
Әзірге қоқан-лоқы хаттарын кім ұйымдастырғаны және оларды жіберген адамдардың өзара байланысы бар-жоғы белгісіз.