Қазақстанның Сыртқы істер министрі Мұхтар Тілеуберді шетелдік инвесторлармен жұмыс істеу тәртібі өзгеретінін айтты. Жаңа жоспарға сәйкес, Kazakh Invest ұлттық компаниясы «Бәйтерек» холдингіне қосылуы мүмкін, деп хабарлайды Ulysmedia.kz.
Инвестиция үшін тек ақша жеткіліксіз
Қазақстан шетелдік ірі компаниялардан тек қаржы салуды емес, жаңа технологиялар әкеліп, тәжірибесімен бөлісуді де күтеді. Бұл туралы Мұхтар Тілеуберді шетел мемлекеттерінің өкілдерімен кездесуде айтты.
– Қазақстанға инвестиция тарту кезінде біз үшін қаржы ғана маңызды емес. Шетелдік компаниялар жаңа технологиялар мен ноу-хау әкеліп, түрлі саладағы басқару тәжірибесімен де бөлісуі керек, – деді министр.
Сонымен бірге Қазақстан маңызды әрі күрделі жобаларды қаржыландыруға шетелдік инвесторлармен бірге қатысуға дайын. Министрдің айтуынша, алдағы жылдары Ұлттық қордан құрылыс жобаларына 14 миллиард доллардан астам қаражат бөлінеді.
Kazakh Invest «Бәйтерекке» қосылуы мүмкін
Мұхтар Тілеубердінің айтуынша, қазір Қазақстан инвестиция тарту жүйесін қайта қарап жатыр. Қолданыстағы тәртіп бойынша, инвестициялық саясатқа Ұлттық экономика министрлігі, ал шетелдік инвесторларды тартуға Сыртқы істер министрлігі жауап береді. Енді бұл жүйеге өзгеріс енгізу жоспарланып отыр. Атап айтқанда, Kazakh Invest ұлттық компаниясын «Бәйтерек» холдингімен біріктіру көзделген.
Министрдің сөзінше, бұған Kazakh Invest компаниясының мүмкіндігі шектеулі болғаны себеп. Компания шетелдік инвесторларды тартып, олардың жобаларын сүйемелдегенімен, сол жобаларға инвесторлармен бірге қаржы сала алмаған.
– Сондықтан біз «Бәйтерек» холдингін Қазақстандағы жобаларды жүзеге асыруға және оларға ортақ инвестиция салуға мүмкіндік беретін тетік ретінде қарастырып отырмыз, – деді министр.
Ал Сыртқы істер министрлігі шетелдік инвесторлармен келіссөз жүргізіп, әлеуетті серіктестерді іздеу және оларды Қазақстанға тарту жұмыстарын жалғастырады. Сондай-ақ шетелдік компаниялармен инвестициялық келісімшарттар жасасып, мемлекеттік қызметтер көрсетеді.