Шымкентте абаттандыру және қоғамдық тәртіпті сақтау шаралары кезінде 700-ге жуық құқықбұзушылық анықталды. Қоқысты белгіленбеген жерге тастау, қоқыс жәшіктерін бүлдіру және қоғамдық орындарды ластау қала тұрғындарына қолайсыздық туғызып қана қоймай, тазалау мен жөндеу жұмыстарына қосымша шығын шығаруға мәжбүр етеді, деп хабарлайды Ulysmedia.kz.
Қоқыс контейнерлерінің жанына тасталған қаптар, сынған жәшіктер мен ластанған көшелер тұрғындардың жайлы өмір сүруіне кедергі келтіреді. Қазақстанда абаттандыру қағидаларын бұзғаны және қоғамдық орындарды ластағаны үшін жауапкершілік қарастырылған. Жазаның түрі мен айыппұл мөлшері құқықбұзушылықтың сипаты мен мән-жайына байланысты белгіленеді.
Мәселен, қоқысты белгіленбеген жерге тастау мен қала мүлкін қасақана бүлдіру үшін заңның әртүрлі баптары бойынша жауапқа тартылуы мүмкін.
Қала тұрғындарына тұрмыстық қалдықтарды арнайы контейнерлерге тастау қажеттігі ескертіледі. Оларды контейнердің жанына қалдыруға болмайды. Әсіресе балалар алаңдарының, аялдамалардың, саябақтар мен жасыл желек аумақтарының тазалығын сақтауға мән берген жөн.
Ескі жиһаз, құрылыс қалдықтары және басқа да ірі көлемді қоқыстарды белгіленген тәртіппен бөлек шығару қажет.
Тұрғындар қоқыстың заңсыз төгілгенін немесе қала мүлкінің бүлінгенін байқаса, бұл туралы уәкілетті органдарға хабарлай алады. Өтініште оқиғаның нақты орны мен уақытын көрсеткен жөн. Мүмкіндік болса, қауіпсіздік талаптарын сақтай отырып, фото немесе бейнематериал қоса жіберуге болады.
Шымкентте «Заң мен тәртіп» қағидаты аясындағы жұмыстар жалғасып жатыр. Тұрғындарға тазалық пен тәртіпті сақтау күнделікті қарапайым әдеттерден басталатыны ескертіледі. Қоқысты арнайы жәшікке тастау, қоғамдық мүлікке зиян келтірмеу және аула тазалығын сақтау сияқты қарапайым әрекеттер қаланың көркеюіне ықпал етеді.
Сондай-ақ балаларды кішкентайынан қоғамдық орындарға ұқыпты қарауға тәрбиелеуге ерекше мән беру ұсынылады. Сонда тазалық сақтау мен ортақ мүлікке жанашырлық таныту олардың бойына бала кезден сіңген дағдыға айналады.