Бұл сұраққа Ішкі істер министрлігі Әкімшілік полиция комитетінің ерекше тапсырмалар жөніндегі аға инспекторы Ақтоты Боранова жауап берді, деп хабарлайды Ulysmedia.kz.
«Қала сыртындағы жол апаттардан өлім-жітім Алматы, Жамбыл, Жетісу, Ақтөбе, Атырау, Ақмола, Түркістан және Маңғыстау облыстарында көп болады. Мысалы, 2023 жылдың 9 маусымында Жамбыл облысында, «Алматы – Ташкент» автожолында «Lexus570» маркалы автокөліктің жүргізушісі рульге ие бола алмай қалып, жол жиегіндегі жыраға аударылған. Апат салдарынан жүргізуші мен оның екі жолаушысы оқиға орнында көз жұмып, тағы бір жолаушы ауруханаға жеткізілді», - деді Ақтоты Боранова брифингте.
ІІМ өкілі жазғы каникулда балалардың қатысуымен болатын жол-көлік оқиғалары ерекше алаңдаушылық туғызатынын атап өтті.
«Жыл басынан еліміз жолдарында кәмелетке толмаған балалар отырған көліктер 1 046 рет жол апатына түскен. Оның салдарынан 72 бала қаза тауып, 1152 бала жарақат алды. Өкінішке қарай, күн сайын жолдарда бір бала қаза тауып, 10-нан астамы зардап шегеді. Апаттан мерт болған балалардың 67%, яғни жартысынан астамы жолаушылар, ал қалған бөлігі жаяу жүргіншілер», - дейді ол.
Айта кетейік, елімізде 2022 жылы 133,5 мың адам қайтыс болды. Өлім-жітімнің негізгі себептері қан айналымы жүйесінің аурулары – 22,7%, ісік – 10,4%, тыныс алу органдарының аурулары – 9,8%, жазатайым оқиғалар, улану мен жарақаттар – 8,4% және ас қорыту жүйесінің аурулары – 8% болды.