Белгілі әнші Төреғали Төрәлінің қамаудағы мерзімі аяқталды, деп хабарлайды Ulysmedia.kz.
Алматы қалалық сотының мәліметінше, әншіні қамауда ұстау әкімшілік жазасы 17 шілде күні аяқталды.
Өнер иесінің қорғаушысы әлеуметтік желіде оның бостандыққа шыққанын жазды.
«Төреғали ұлдарыңыз бостандыққа шықты. Барша қолдап, қорғаған оқырмандарға мың алғыс! Бәрі жақсы, уайымдағандарыңыз үшін рақмет айтамын!», - деп жазды ол.
Еске салайық, бұған дейін әнші Алматыда есірткіге мас күйде ұсталған болатын. Кейінірек Төреғали Төреәлі 20 тәулікке қамалып, 7 жыл мерзімге көлік басқару құқығынан айырылды. Алайда әншінің адвокаттары өз клиенттерінің құқығы бұзылғанын айтып, наркологиялық сараптаманың қорытындысымен келіспейтіндерін мәлімдеді.
Сондай-ақ, оның үстінен қылмыстық кодекстің 308-бабы "Билік өкілін қорлау" бойынша іс қозғалды.