2023 жылдың наурыз айында жүргізілген «Халықтың тұрмыс сапасы» зерттеу қорытындысы бойынша респонденттердің 41,8%-ы өз өмірлеріне қанағаттанған, деп хабарлайды Ulysmedia.kz.
Ұлттық статистика бюросының мәліметінше, өмір сапасына қанағаттанғандар үлесі ауылдық жерлерде – 46,5% (қалада – 39,6%). Өз өміріне қанағаттанған ер адам үлесі – 45,4%, әйелдерде – 39,5%.
2022 жылғы осы тектес зерттеумен салыстырғанда респонденттердің өміріне қанағаттану деңгейі 0,5 п. т. өсті (2022 жылы – 41,3%). Ал 2021 жылға қарағанда 19,5 п. т. төмен (2021 жылы – 61,3%).
Атап айтқанда, денсаулығына қанағаттанғандар – 47,6%, ішінара қанағаттанғандар – 49,3% жедел жәрдем қызметінің сапасына қанағаттанғандар – 56,1%, қаржылық жағдайына қанағаттанғандар – 34% болған.
Үй шаруашылықтарының дәулеті жағынан төмен не орташа деңгейден төмен болуының негізгі себептері ретінде төмен еңбекақы – 92,7% және төмен зейнетақы – 1,4% аталған.
Жұмыс істейтін халықтың жұмыспен қамтылу мәртебесіне байланысты: 94,4%-ы негізгі себеп төмен жалақы деп атап өтті, ал жұмыссыздардың негізгі себебі, тиісінше, жұмыстың болмауы - 78,5%.
Айта кетейік, жуырда Мәжіліс депутаты Елнұр Бейсенбаев халықтың орташа табысы мен қымбатшылық жайлы ресми статистика шындыққа сай келмейтінін айтты.
Ал Депутат Мәди Тәкиев қазақстандықтардың жалақысының күнделікті қажеттіліктерінен артылмайтынын мәлімдеген еді.