Энергетика министрлігі Алматы облысындағы үлкен ауылының тұрғындары қарсы болған жағдайда атом электр станциясын салу үшін балама орын іздемек, деп хабарлайды Ulysmedia.kz.
Үкімет кулуарларында вице-министр Жандос Нұрмағамбетовтен тілшілер Үлкен ауылы тұрғындарының шешімі атом электр станциясын салу мәселесі бойынша түпкілікті шешім бола ма деп сұрады.
"АЭС салынатын орын туралы шешім қабылдау үшін Алматы облысы әкімдігінің пікірі қажет. Бүгін не иә, не жоқ – әкімдіктен жауап аламыз. Содан кейін станцияны орналастыру туралы шешім қабылданады. Бірақ станция салынбас бұрын техникалық-экономикалық негіздеме жасалады. Қоршаған ортаға әсерді бағалау, барлық мүдделі тараптардың пікірі жиналады. Бұл жұмыс енді ғана басталып жатыр", - деп жауап берді ол.
Журналистер Үлкен тұрғындарының көпшілігі қолдамаған жағдайда не болатынын нақтылады. Нұрмағанбетов егер тұрғындардың қарсылық білдірсе, Алматы облысы мәслихатының шешімі күшіне енбейтінін энергетика министрлігі АЭС салу үшін жаңа орын іздейтінін мәлімдеді.
Естеріңізге сала кетейік, бүгін Алматы облысында атом электр станциясын салу мәселесі бойынша жария тыңдау өтті.
Тыңдаулар басталмай тұрып АЭС құрылысына наразы топ станция салуды қолдаған сарапшыға шүйліккенін хабарлағанбыз.