Шымкентте «Фосфорник» мәдениет үйінің жаңа ғимаратының құрылысы басталды, деп хабарлайды Ulysmedia.kz.
ТӨЛЕШОВТІҢ ЖЕРІ
1980 жылы ашылған бұл мәдениет үйі қаладағы басты мәдени орталықтардың бірі болған. Біраз уақыт бұл нысан Тоқтар Төлешовтің меншігінде болып, онда балалар үйірмелері жұмыс істеген. Алайда Төлешов билікті басып алуға әрекет жасағаны үшін сотталғаннан кейін, ғимарат пен оған тиесілі жер телімі мемлекетке тәркіленді, бірақ әкімдік оларды өз балансына қабылдамаған.
Соңғы жылдары ғимарат бос әрі қараусыз жатқан. 2023 жылы ол коммуналдық меншікке өткеннен кейін, техникалық тексеріс нәтижесінде сүрілген.
- Бұл нысанның құрылысы — болашаққа жасалған маңызды инвестиция. Жаңартылған мәдениет үйі бұрынғы даңқын ғана қалпына келтіріп қоймай, мегаполистің шығармашылық орталығына айналады, деді Шымкент қаласының әкімі Ғабит Сыздықбеков капсула салу рәсімінде.
МӘДЕНИЕТ ҮЙІНДЕ НЕ БОЛАДЫ
• IT-хаб, креативті хаб, қоғамдық бастамалар хабы;
• Креативті индустрияларға арналған алаңдар, көркемөнер шеберханасы, көрме кеңістігі, амфитеатр, коворкинг, кеңсе орындары, форумдар алаңы, сән көрсетілімдеріне арналған сахна;
• Бизнес-инкубатор, фото/видео студиялар, дыбыс жазу студиясы, конференц-зал, қалалық қауымдастықтардың филиалдары болады.