Алматы облысында екі кәсіпкер арасындағы дау қанды қылмыспен аяқталды. Қарасай ауданында демалыс орнына жақын маңнан өртенген көлік пен ішіндегі мәйіт табылған, деп хабарлайды Ulysmedia.kz.
Өртенген көліктен адам мәйіті табылды
КТК мәліметінше, оқиға орнына келген полицейлер толық отқа оранған көліктің қалдықтарын ғана тапқан. Оның ішінен ер адамның күйіп кеткен мәйіті табылып, бірден қылмыстық іс қозғалды.
Куәгер не дейді
Оқиға орнында болған жергілікті тұрғын Алмасбек Сарменбетов болған жайтты сипаттап берген.
- Ертеңгісін сағат 8-де полиция келіп, темір сындыратын құрал сұрады. Сөйтсем, мәйітті көліктің жүк салғышынан тапқан екен. Ашпағанбыз… Іші күйіп кеткен дейді, дейді ол.
Күдікті – 43 жастағы кәсіпкер серіктесі
Көп ұзамай тәртіп сақшылары 43 жастағы күдіктіні ұстады. Ол қазір уақытша ұстау изоляторында отыр. Тергеу барысында марқұм мен күдіктінің жүк тасымалымен айналысқан серіктестер екені анықталды. Екеуінің арасында табысты бөлісе алмаудан туған жанжал болған.
Қаскөй досын балғамен ұрып өлтіріп, көлігімен бірге өртеген
Тергеу нұсқасы бойынша, ашуға бой алдырған ер адам серіктесін балғамен ұрып өлтіріп, кейін қылмыстың ізін жасыру үшін оны көлігімен бірге өртеп жіберген.