БҰҰ Бас хатшысы Антониу Гутерриш Газадағы Әл-Шифа орталық ауруханасы маңында жедел жәрдем көлігі кортежіне жасалған шабуылға қатысты пікір білдірді, деп хабарлайды Ulysmedia.kz.
Әл-Шифа ауруханасының кіреберісін атқылау кезінде ондаған адам қаза тауып, жараланды, деп жазды Палестинаның WAFA ақпарат агенттігі. Шабуыл құрбандары науқастар, жараланғандар, олардың туыстары мен медицина қызметкерлері болды.
БҰҰ Бас хатшысының мәлімдемесі
Біріккен Ұлттар Ұйымының Бас хатшысы мәлімдемесінде болған оқиғадан қатты шошығанын жеткізген.
«Газадағы Аль-Шифа ауруханасының сыртында жедел жәрдем кортежіне жасалған шабуыл туралы хабар жүрегімізді ауыртты. Аурухананың сыртында, көшеде шашылып жатқан мәйіттердің суреттері, тіпті қорқынышты. (...) Бір айға жуық уақыттан бері Газа тұрғындары, соның ішінде балалар мен әйелдер қоршауда қалды, көмектен бас тартты, өлтірілді және бомбаланды, үйлерінен қуылды. Мұны тоқтату керек», - деді Бас хатшы мәлімдемеде.
Гутерриш тараптарды қақтығысты гуманитарлық жолмен тоқтатуға, ал ықпалы бар тараптарды «жанжалдың бүкіл аймаққа таралуын болдырмауға» күш салуға шақырды.
БҰҰ Бас хатшысы Израильде ХАМАС жасаған лаңкестік әрекеттерді, адамдарды, соның ішінде әйелдер мен балаларды өлтіру мен ұрлауды ұмытпайтынын айтты. Сонымен қатар Гутерриш барлық кепілге алынғандарды дереу босатуға шақырды.