Кәсіпорынның барлық табысының жартысына жуығы республикалық бюджеттен түсетін түсімнен келеді, деп хабарлайды Ulysmedia.kz.
Жоғары аудиторлық палата басшысы Наталья Годунова "Қазсушар" кәсіпорнының қаржылық жағдайы тұрақсыз күйде екенін айтты. Десе де, компанияның өзі керісінше ақпарат береді.
Годунованың айтуынша, кәсіпорынның барлық табысының 48%-ы республикалық бюджеттен түсетін түсім.
– Қаржылық тұрақтылық ойдан шығарылған, өйткені бұл көрсеткіш қолма-қол ақшаны бақылау шотындағы бос ақша қаражаттарының қалдығы есебінен бұрмаланған. Жаз басында қалдық 19 млрд теңгені құрады. Бұл барлық қолма-қол ақшаның 57% құрайды және бұл қаражат 2018 жылдан бастап жинақталған сома. Біз бұл мәселеге үлкен мән береміз. Үш аудит жүргізілді. Ұйымдастырушы жағынан да мәселе бар: әр кезде жауап берер ешкім жоқ. Әр жолы отырысқа су ресурстары комитеті мен "Қазсушардың" жаңа басшылары келеді", - дейді Наталья Годунова.
Қазсушар – су ресурстары комитетінің шаруашылық жүргізу құқығындағы республикалық мемлекеттік кәсіпорны. Ол республикалық маңызы бар су шаруашылығы объектілерін пайдаланумен, күтіп-ұстаумен және олардың қауіпсіздігін қамтамасыз етумен, суармалы және ауыз су берумен айналысады.