Елордада ескі тұрғын үйлерді жаңарту бағдарламасы аясында апатты үйлерді бұзу және елорда тұрғындарын жаңа тұрғын үйге көшіру мәселесі қарастырылған. 2024 жылы 60 апатты үйдің тұрғындары 1 400 пәтерге көшеді, осылайша шамамен 4 200 адам тұрғын үймен қамтамасыз етіледі, деп хабарлайды Ulysmedia.kz.
Астана әкімдігі ресми сайтының мәліметінше, 2013 жылдан бастап елордада 286 апатты үйдің тұрғындары қоныс аударды. Осылайша, 4 500-ден астам отбасы жаңа абаттандырылған пәтерлерге ие болды.
Астанада 2023-2029 жылдарға арналған тұрғын үй қорын жаңарту жобасы аясында 206 апатты үйдің тұрғындары 4 710 пәтерге көшіріледі.
Тұрғын үй қорын жаңарту тұрғын үйді және үй орналасқан жер учаскесін реквизициялау тәртібімен апаттық (ескірген) тұрғын үйді бұзу және одан азаматтарды көшіру жолымен қаланың «ескі» кварталдарын кешенді реконструкциялауды көздейді.
Жобаның шарттары бойынша апаттық үйлердің тұрғындарына құқық белгілейтін құжаттарға сәйкес, бөлмелер санына және адам санына қарамастан, ауданы бойынша бірдей мөлшерде, кемінде 1 бөлмелі жаңа пәтерлер беріледі.
Мемлекет басшысының тапсырмасы бойынша тұрғын үй жағдайларын жақсарту үшін ТК жөндеу, лифттерді ауыстыру, жеңілдетілген әлеуметтік тұрғын үй салу, ұзаққа созылған құрылыстарды аяқтау бойынша жұмыстар жүргізіліп жатыр. Осы бағыт бойынша жұмыстар жоспарлы түрде жалғасуда.