Ақорда мемлекет басшысы Қасым-Жомарт Тоқаевтың Отан қорғаушылар күнімен құттықтауын жарилады, деп хабарлайды Ulysmedia.kz.
- Қадірлі отандастар! Сіздерді Отан қорғаушы күнімен құттықтаймын!
Еліміздегі бейбітшілік пен тыныштықты сақтап, қастерлі құндылықтарды орнықтыра түсу үшін бұл мерекенің маңызы зор.
Әскери борышты өтеу Отанға деген шынайы сүйіспеншіліктің жарқын көрінісі екені анық. Халыққа қалтқысыз қызмет ету – әрбір адал азаматтың перзенттік парызы, – делінген құттықтауда.
Тоқаев Қазақстан ұлттық мүддені қорғауға, аумақтық тұтастықты сақтауға және тұрақтылықты қамтамасыз етуге баса мән беретінін, айбынды армиямыз егемендігіміздің кепілі, мемлекеттілігіміздің мызғымас тірегі саналатынын атап өтеді.
- Біз әскеріміздің әлеуетін оқу-жаттығу жиындарында ғана емес, нақты міндеттерді жүзеге асыру барысында да көріп жүрміз. Алапат тасқын ел-жұртқа қауіп төндіргенде, сарбаздарымыз алдыңғы шептен табылды. Олар өздеріне жүктелген міндетті мінсіз атқарып, отаншылдықтың озық үлгісін көрсетті.
Еліміздің қорғаныс қабілетін күшейту және әскери қызметкерлерді қолдау қашанда мемлекеттік саясаттың басым бағыты болып қала береді. Қарулы Күштеріміздің мерейі үстем болсын!Баршаңызға зор денсаулық, бақ-береке тілеймін! – делінген ққттықтауда.
Еске сала кетейік, кеше президент Отан қорғаушылар күні мен Жеңіс күні қарсаңында марапаттар табыстаған еді.