Голан жоталарындағы Фауар бітімгерлік базасында Қазақстан Республикасының Мемлекеттік туын көтеру салтанатты рәсімі өтті деп хабарлайды Ulysmedia.kz.
Қорғаныс министрлігінің мәлімдеуінше, Отан қорғаушы күні болған бұл тарихи оқиға символдық маңызға ие.
Салтанатты іс-шараға миссия командирі генерал-лейтенант Курмал Нирмал және миссия құрамындағы бітімгерлік контингенттердің басшылары қатысты.
Қазақстанның Біріккен Ұлттар Ұйымының бітімгерлік миссиясын өз бетінше орындауға мандат алуы – ел әскери қызметшілері дайындығының жоғары деңгейін және әлемдік аренадағы беделін мойындаудың дәлелі.
БҰҰ миссиясының мандатына сәйкес Голан биіктігінде 139 қазақстандық қарсылас тараптар арасында атысты тоқтату режимін сақтау міндеттерін орындайды.
Қазақстанды мемлекеттен тыс жерде таныстыру - үлкен мәртебе және жауапкершілік. Еліміздің көк Туы бейбітшілік пен тұрақтылық үмітінің символы болсын, – деп атап өтті ұлттық бітімгерлік контингенттің командирі подполковник Жігер Аипов.
Қазақстандық бітімгерлік контингент миссия қолбасшысының резервтік ротасы бола отырып, жауапкершілік аймағында патрульдеу, блок-бекеттерін күзету және жарылыс қаупі бар заттарды тазарту жөніндегі міндеттерді орындайды.
Бітімгерлік ротаның жеке құрамы миссия штабы орналасқан Фауар базасында шоғырланған. Өздеріне жүктелген міндеттерді тиімді орындау үшін қазақстандық бітімгерлер барлық қажеттіліктермен қамтамасыз етілген.