Пәкістан астанасы Исламабадта Қырғызстандағы тәртіпсіздікке ұласқан жастардың шетелдіктермен төбелесіне байланысты наразылық акциясы болып өтті, деп хабарлайды Ulysmedia.kz порталы dawn.com ақпарат көзіне сілтеме жасап.
Пәкістан астанасындағы наразылық
Сенбіде Исламабадтағы Қырғызстан елшілігінің ғимараты алдындағы Бішкектегі пәкістандық студенттері мен қырғыз жастарының төбелесіне байланысты наразылық білдірген адамдар жиналды. Наразылық білдірушілер Қырғызстан астанасы Бішкектегі шетелдік студенттерге, соның ішінде пәкістандықтарға қатысты "зорлық-зомбылық жасалды" деп, оларды қатты айыптады.
Дипломаттардың қорғалуын қамтамасыз ету үшін ауданға қосымша полиция бөлімшелері келді. Полиция елшіліктің айналасына тікенді сым қоршау орнатты.
– Қырғызстанда балаларымызды сабап жатыр, - дейді Исламабадтағы наразылық білдірушілер.
Пәкістанның премьер-министрі не деді
Пәкістан премьер-министрі Шахбаз Шариф Бішкектегі пәкістандық студенттермен жергілікті тұрғындардың төбелесі салдарынан болған тәртіпсіздік жөнінде пікір білдірген еді. Шахбаз Шариф әлеуметтік желілерде студенттердің жағдайына алаңдайтынын және жағдайды бақылап отырғанын жазды.
– Қырғызстанның Бішкек қаласындағы пәкістандық студенттердің жағдайына қатты алаңдаймын. Мен Пәкістан елшісіне барлық қажетті көмекті көрсетуді тапсырдым. Менің кеңсем де елшілікпен байланыста және жағдайды үнемі қадағалап отыр, - деді ол.
Оқиға неден басталды
Бішкекте 300-ге жуық жас жігіт жаппай төбелестен кейін шетелдіктерден кек алу үшін көшеге шығып, тәртіпсіздік жасаған. Бұған жауап ретінде қала милициясы барлық жеке құрамды жауынгерлік дайындық жағдайына келтірді.
Оқиға 7 сәуір мен Огонбаев көшелерінің қиылысында болды. Жиналған жас жігіттер шетелдіктермен төбелесіп қалған, бұл құқық қорғау органдарымен қақтығысқа ұласқан.
Құқық қорғаушылар кордон қойып. ашынған топты тоқтатуға тырысқан.
Бірнеше рет адамдар кордонды бұзуға тырысты, бірақ тәртіп сақшылары оларды ұстап алып, 10-ға жуық адамды қамауға алынды. Оқиға салдарынан шетелдіктердің жергілікті тұрғындарды ұрып-соғу фактісі бойынша (бұзақылық) қылмыстық іс қозғалды.
Тәшиевтің мәлімдемесі
Осы оқиғадан кейін Қырғызстан мемлекеттік ұлттық қауіпсіздік комитеті басшысы Қамшыбек Тәшиев құқық қорғау органдары Қырғызстанда заңсыз жүрген шетелдіктерді жаппай тексеруді бастағанын айтты. Оларды депортацияланады.
– Біз республика аумағында заңсыз жүрген 5 мыңға жуық азаматты анықтадық. Оның 1300-і пәкістандықтар, 1300-і Бангладеш азаматтары, қалғандары басқа елдерден. Қазір оларды одан әрі депортациялау бойынша белсенді іс-шаралар жүргізілуде, - деді ол әлеуметтік желі арқылы.
Шенеунік митингіге қатысушылардың талаптарын қолдайтынын атап өтті, бірақ арнайы қызметтер митингті үйлестірген және арандатушылық жасаған адамдарды анықтаған. Олардың кейбірі ұсталған. Жеке адамдардан атыс қаруы табылған. Тәшиев тыныштықты сақтау үшін құқық қорғаушылар барлық іс-шараны қабылдайтынын айтты.