Оқыс оқиға 14 қыркүйекте тіркелген. Алматы облысында парашютпен жоспарлы секіру оқу-жаттығуын орындау кезінде Қарулы Күштердің әскери қызметкері қаза тапты, деп хабарлайды ulysmedia.kz.
Офицердің әскери шені «капитан», 1990 жылы дүниеге келген. Туыстарының өтініші бойынша Қорғаныс министрі бұдан өзге ақпарат жария етілмейтінін хабарлады.
«Бұрын ол 50 рет парашютпен секірген. Штаттан тыс парашютті-десант құтқарушылар тобының құрамына кірген. Қайғылы жағдайдың мән-жайы анықталып жатыр. Қорғаныс министрлігінің басшылығы және Қарулы Күштердің жеке құрамы қаза болған әскери қызметшінің жақындары мен туыстарына қайғырып көңіл айтады», - делінген Қорғаныс министрлігінің хабарламасында.
Министрлік әскери қызметшінің отбасына көмек көрсету жөніндегі қажетті шараларды қабылдамақ.