Туризм және спорт министрлігі әзірге интернет-казиноларды насихаттау мәселесін толық шешудің жолын білмейді, деп хабарлайды Ulysmedia.kz.
Вице-министр Мирас Төлебаев Қазақстанда онлайн-казиноларға тыйым салынғанын, ресми букмекерлік қызметке лицензия қажет екенін, алайда мұндай шаралардың жеткіліксіз екенін атап өтті.
"Өкінішке орай, бұл мәселенің әмбебап шешімі жоқ. Интернет-казинолар тіпті ғаламтор қатаң бақыланатын елдерде де гүлденіп тұр", - деді ол.
Шенеунік ұзақ уақыт бойы негізгі құрал тыйым салынған интернет-ресурстарды бұғаттау болғанын хабарлады. Мәселен, 2023 жылы билік 4 мыңнан астам заңсыз казино мен букмекерлік сайттарды бұғаттаған.
"Ұйымдастырушылар дереу басқа сайттар ашып, тыйым салынған қызметін жалғастырып жатыр", - деп қосты спикер.
Вице-министр құмар ойындар туралы заң күшіне енгеннен кейін онлайн-казино ұйымдастырушылар ҚР ҚК-нің 307-бабы бойынша қылмыстық жауапкершілікке тартылатынын атап өтті.
Сондай-ақ, ол құмар ойын бизнесінің заңды ұйымдастырушыларының тізімі министрлік сайтында және е-лицензиялау порталында қолжетімді екенін айтты.