Азаматтық авиация комитетінің мәліметі бойынша, отандық және шетелдік әуе компанияларын жауапкершілікке тарту жұмыстары жалғасуда, деп хабарлайды Ulysmedia.kz.
Комитет жазғы кезеңде әуе компанияларына қызметтерді уақтылы көрсетпеу немесе рейстің кешігуі кезінде қызмет көрсету туралы жолаушылардың шағымдары жиі түсе бастағанын хабарлады.
АЙЫППҰЛ КӨЛЕМІ
Осылайша, 11 шілдедегі Алматы-Қарағанды рейсінің жолаушыларын қонақүйге орналастырмағаны және оларға трансфер ұйымдастырмағаны үшін Fly Arystan әуе компаниясы жазаланды. Компанияға 3 692 000 теңге айыппұл салынды.
"Бұған дейін 24 маусымда Атырау – Алматы бағыты бойынша рейстің кешігуі кезінде қызметтерді тиісінше көрсетпегені үшін «SCAT» әуе компаниясы әкімшілік жауапкершілікке тартылды, айыппұл сомасы 1000 АЕК (3 692 000 теңге) құрады", - деп хабарлады Комитет.
Еске сала кетейік, бұған дейін Премьер-Министрдің бірінші орынбасары Роман Скляр Air Astana әуе компаниясына қатысты көптеген шағымдарға түсініктеме берген болатын.
Қазақстандықтар әуе рейстерінің ұзақ және жиі кешігуіне үнемі шағымданады.