ҚР Еңбек және халықты әлеуметтік қорғау вице-министрі Асқарбек Ертаев Оңтүстік Кореяға жұмыс сапары аясында Корея Республикасы Жұмыспен қамту және еңбек министрлігінің өкілдерімен кездесу өткізді. Келіссөздер барысында тараптар Қазақстанды Оңтүстік Кореядағы еңбекке рұқсат беру жүйесіне – Employment Permit System (бұдан әрі – EPS) енгізу мәселелерін талқылады, деп хабарлайды Ulysmedia.kz министрліктің баспасөз қызметіне сілтеме жасап.
ОРТАЛЫҚ ҚҰРЫЛАДЫ
«Қазақстан мигранттардың еңбек және әлеуметтік құқықтарын қорғау үшін құқықтық базаны одан әрі жақсартуға бағытталған бірқатар кешенді шаралар қабылдауда. Атап айтқанда, Алматы қаласында Корея Республикасында жұмыс істегісі келетін Қазақстан Республикасының азаматтарын кәсіптік және тілдік даярлау бойынша көпсалалы орталық құрылуда», – деді Асқарбек Ертаев.
Сондай-ақ, ол техникалық мамандықтар бойынша тестілеу, медициналық тексеру, біліктілікті арттыру бойынша оқытуға дайын бірқатар әлеуметтік және өндірістік объектілер анықталғанын хабарлады.
ЗАҢСЫЗ КӨШІ-ҚОН
«ҚР Ішкі істер министрлігімен бірлесіп заңсыз көші-қонның жолын кесуге және заңды еңбек қызметін кеңейту үшін жағдай жасауға бағытталған шараларды күшейту мәселелері пысықталуда», – деп толықтырды вице-министр.
Келіссөздер қорытындысы бойынша Корея Республикасы Жұмыспен қамту және еңбек министрлігінің өкілдері Қазақстанды EPS жүйесіне қосу туралы ниетін тағы да растаған, бұл Қазақстан азаматтарына жасалған еңбек шарттары шеңберінде Оңтүстік Кореяда заңды түрде жұмыс істеуге мүмкіндік береді.