17-19 қарашада Қазақстанның оңтүстігінде күндіз ауа температурасы 10-20 градусқа дейін жылынады. Ал елдің орталығында және шығыс пен оңтүстік-шығыстың таулы аймақтарында түнде 13-18 градус аяз болады. Батыс, солтүстік-батыс және солтүстік өңірлерде жаңбыр мен қар жауып, көктайғақ болады, деп хабарлайды Ulysmedia.kz.
Қазір елдің шығысында антициклон әсерінен күн ашық әрі жауын-шашынсыз болады. Сондықтан шығыс, оңтүстік және орталық өңірлерде құрғақ ауа райы сақталады.
Ал батыстан солтүстік циклон келе жатыр. Ол әуелі батыстағы, кейін солтүстік-батыс пен солтүстік өңірлердегі ауа райына әсер етеді.
Жаңбыр, қар және көктайғақ
Батыс, солтүстік-батыс және солтүстік өңірлерде жаңбыр мен қар жауады. Жолдарда көктайғақ болады. Еліміздің барлық аймағында жел күшейеді. Солтүстікте және оңтүстік облыстардың таулы аудандарында түнде және таңертең тұман түседі.
Оңтүстікте жылы, орталықта суық
Еліміздің басым бөлігінде түнде ауа температурасы нөлден төмендейді. Ең қатты аяз орталық өңірлерде және шығыс пен оңтүстік-шығыстың таулы аймақтарында болады. Онда сынап бағаны 13-18 градусқа дейін төмендейді.
Күндіз оңтүстікте күн жылы болады. Мұнда ауа температурасы 10-20 градусқа дейін көтеріледі. Оңтүстік-шығыста 10-18, оңтүстік-батыста 10-15 градус жылы болады.
Батыс пен шығыста күндіз ауа температурасы 5-10 градус аралығында болса, солтүстік пен орталықта ең төменгі көрсеткіш тіркеледі. Бұл өңірлерде ауа температурасы 1 градус аяздан 4 градусқа дейін жылы болады.