Жоғары білімі бар азаматтардың үштен бірі Қазақстаннан кетіп жатыр. Бұл туралы дүниежүзілік банктің есебінде айтылды, деп хабарлайды Ulysmedia.kz.
ТЕК ҚАЗАҚСТАНДА ҒАНА ЕМЕС
Мамандандырылған жұмысшылардың эмиграциясы мәселесі тек Қазақстанда ғана емес, сондай-ақ Албания, Босния және Герцеговина, Молдова, Армения, Болгария, Хорватия, Қырғызстан және Солтүстік Македонияда да байқалады.
БҰҒАН НЕ СЕБЕП?
«Жоғары білікті мамандардың эмиграциясына бірнеше фактор әсер етеді. Тарту факторлары Еуропалық Одақ елдерінің аумақтық жақындығын қамтиды, онда осындай кадрларға сұраныс жоғары. Ал итермелеуші факторлар өз елдерінде кейбір мамандықтар бойынша жұмысқа орналасу мүмкіндіктерінің шектеулігімен байланысты», – делінген есепте.
ҚАЗАҚСТАН ЭКОНОМИКАСЫ ТУРАЛЫ
Сондай-ақ қаржы институты Қазақстан экономикасына қатысты болжамын жариялады. Биыл былтырғы 5,1%-бен салыстырғанда 3,4%-ға дейін төмендеуі мүмкін. Бұл Теңіз кен орнын кеңейту жобасының кешігуімен, сондай-ақ қатаң қаржылық саясатпен байланысты.
ОРТАЛЫҚ АЗИЯ ЭКОНОМИКАСЫ ТУРАЛЫ
Сонымен қатар, Орталық Азияның басқа елдеріндегі болжамдар орта есеппен 1 пайыздық тармаққа жақын жоғарылауы мүмкін.
Есепке сәйкес, 2025 жылы бұл аймақ экономикалық өсу қарқыны бойынша қалған субаймақтардан озады деген болжам бар. Бұл, ең алдымен, Қазақстандағы мұнай өндіру көлемінің артуы аясында динамикалық өсумен байланысты.