Қазақстандық мектептерде тірек-қимыл аппараты бұзылған балаларға арналған жеке көмекшілер пайда болады, деп хабарлайды Ulysmedia.kz.
Үкімет отырысында Оқу-ағарту министрі Ғани Бейсембаев инклюзивті және арнайы білім беруді дамыту бойынша қабылданып жатқан шараларға тоқталды.
Оның айтуынша, елімізде 496 ұйым жұмыс істейді, сондай-ақ арнайы қолдауға мұқтаж балаларға арналған 1071 кабинет жабдықталған. Мектептердің 88%-да және колледждердің 80%-да инклюзивті оқыту үшін жағдайлар жасалған.
Мектептерде «Педагог-ассистент» лауазымы енгізілді, бұл мамандар санын бір жылда 1-ден 2,5 мыңға дейін арттыруға мүмкіндік берді. Енді бұл лауазымның ашылуы мектепке дейінгі ұйымдарда да қарастырылуда. Ерекше білім беру қажеттіліктері бар балалармен барлығы 9 мыңнан астам арнайы педагог жұмыс істейді.
Келесі жылдан бастап педагог-ассистенттер колледждерде дайындала бастайды. Тірек-қимыл аппараты бұзылған балалар үшін мектепте «Жеке көмекші» лауазымы енгізіледі. Сондай-ақ, «Педагог» кәсіби стандартына ерекше білім беру қажеттіліктері бар балалармен жұмыс істеу бойынша жаңа мамандықтар енгізілуде, - деді Ғани Бейсембаев.
Сондай-ақ, қатардағы педагогтердің біліктілігін арттыру бойынша жұмыстар жүргізілуде. Биыл біліктілікті арттыру курстарынан 5 мың педагог өтті.
Ерекше білім беру қажеттіліктері бар балалардың 84%-ы арнайы қолдаумен қамтылған.
Психологиялық-педагогикалық қолдаумен қамтуды ұлғайту үшін мемлекеттік тапсырысты орналастыру механизмі енгізілді. Нәтижесінде балаларды арнайы біліммен қамту 84%-ға жетті. Бұл туралы Оқу-ағарту министрі Ғани Бейсембаев ҚР Үкіметінің отырысында айтты. Бүгінгі таңда мемлекеттік тапсырысты орналастыру механизмі бес өңірде: Алматы, Шымкент, Солтүстік Қазақстан, Жетісу және Қарағанды облыстарында іске асырылуда. Бұл өңірлерде 2 мың бала қамтылды.
Арнайы ұйымдар желісі ұлғайып келеді. Олардың саны 496-ға жетті, бұл өткен жылмен салыстырғанда 21 бірлікке көп. Алайда, ПМПК және түзету кабинеттерінің желісі еліміздің бірқатар өңірлерінде қосымша ұлғайтуды талап етеді. Бұл Алматы, Шымкент, Абай, Түркістан, Қарағанды және Қостанай облыстары.
Ерекше білім беру қажеттіліктері бар балаларды қолдау мемлекеттік саясаттың маңызды бағыттарының бірі, осыған байланысты білім берудің қолжетімділігін қамтамасыз ету, оңалту және арнайы қолдау қызметтерін көрсету сапасын арттыру үшін заңнаманы жетілдіру жөніндегі жұмыс жалғастырылатын болады, - деді Ғани Бейсембаев.
Скрининг нәтижелерімен алмасу үшін министрлік Денсаулық сақтау министрлігінің дерекқорымен интеграция жүргізеді, сондай-ақ ПМПК-ға жазылу автоматтандырады. Оқу-әдістемелік кешендер әзірленуде, оқулықтар кезең-кезеңімен әзірленуде, педагогтер әдістемелік құралдармен қамтамасыз етілді.