Америкалық NBC телеарнасы Илон Масктың мінез-құлқы Дональд Трамптың айналасына ұнамай жүргенін хабарлады, деп жазады Ulysmedia.kz.
Басылым дереккөздерінің айтуынша, Масктың жүргені Трамптың жақын адамдарына жақпайды. Трамптың жанындағы адамдар Маскқа қарағанда президенттің жанында бұрыннан жүр. Олар сайлаудан кейін президенттің резиденциясынан шықпаған Маск өзінің рөлі шеңберінен асып барады деп санайды.
– Ол өзін тең президент сияқты ұстайды және бұл туралы бәрі білетініне көз жеткізгісі келеді, – дейді сұхбат бергендер.
Бұқаралық ақпарат құралдарының хабарлауынша, миллиардер, Мар-а-Лагодағы резиденцияға тәуліктің кез келген уақытында келе алады, Трамппен бірге отырады, оның қоңыраулары мен кездесулеріне қосылады.
Айтпақшы, бұған дейін Трамп Илон Маскты мемлекеттік басқарудың тиімділігі жөніндегі жаңа департаменттің басшысы етіп тағайындағаны хабарланған болатын.
Трамп жаңа департамент мемлекеттік басқаруға кәсіпкерлік көзқарасты қолдана отырып, құрылымдық реформа жүргізу үшін Ақ үймен және бюджеттік басқармамен бірлесіп "кеңес беретінін" атап өтті. Маск, өз кезегінде, департамент мемлекеттік бюджетті ысырап ететіндер үшін "жүйеде дүмпу" жасайтынын мәлімдеді.
– Демократияға қауіп төніп тұр ма? Жоқ! Бюрократияға қауіп бар", – деді ол.
Бұған дейін миллиардер федералды шығындарды 2 триллион долларға қысқарту жоспары барын айтқан болатын. Мемлекеттік қызметкерлерді қысқарту кейбір америкалықтар үшін "уақытша қиындықтарға" әкелуі мүмкін екенін де мойындайды.