Энергетика министрі Алмасадам Сәтқалиев еліміздегі жаңа мұнай өңдеу зауытын (МӨЗ) жобалауды 2030 жылдан кешіктірмей бастау жоспары барын хабарлады, деп жазады Ulysmedia.kz.
Министрдің айтуынша, 2036 жылға қарай ашық түсті мұнай өнімдерінің күтілетін тапшылығына байланысты 2032 жылға қарай қуаттылығы жылына 10 млн тонна МӨЗ құрылысын аяқтау қажет.
– 2030-2036 жылдар аралығында дизель отынына деген қажеттілік жылына қосымша 2 млн тоннаға ұлғаяды. Бұл 2050 жылға дейін жыл сайын 0,3-0,35 млн тоннаға өсетін 0,2 млн тонна тапшылығына алып келеді, — деп нақтылады министр.
Сәтқалиев 2028-2030 жылдар аралығында өндіріс пен тұтыну теңгерімдерін ұдайы өзектендіру қажет болатынын, өйткені 2036-2040 жылдары жанар-жағармай материалдарын (ЖЖМ) импорттау ықтималдығы бар екенін атап өтті.
Министрдің сөзінше, жаңа МӨЗ салу елдің 2040-2050 жылдар аралығында жанар-жағармай қажеттілігін қамтамасыз етіп, мұнай өнімдерін Орталық, Оңтүстік және оңтүстік-батыс Азияның қарқынды дамып келе жатқан нарықтарына экспорттау мүмкіндігін ашады.
ҚАЗАҚСТАНДАҒЫ МӨЗ
Бұған дейін ресейлік "Лукойл" мұнай компаниясы Атырау мұнай өңдеу зауытын сатып алады деген қауесет тараған. Ulysmedia.kz дереккөзінің мәліметінше, егер Атырау МӨЗ сатып алуға "Лукойл" компаниясы қызығушылық танытса, Павлодар мұнай-химия зауытын "Газпром мұнай" компаниясы сатып алуды ойлаған.
Алайда Energy Monitor қоғамдық қорының директоры Нұрлан Жұмағұлов Қазақстандағы МӨЗ-дер әзірге ешкімге қызық емес екенін айтқан еді.