Қасым-Жомарт Тоқаев Қазақстанға мемлекеттік сапармен келген Ресей президенті Владимир Путинді елорда әуежайынан қарсы алды, деп хабарлайды Ulysmedia.kz.
Ақорданың хабарлауынша, мәртебелі қонақты күтіп алу үшін әуежайда Құрмет қарауылы сап түзеген. Қазақстан мен Ресей халықтарының шынайы достығының белгісі ретінде балалар екі елдің жалауын желбіретіп, қошемет көрсеткен. Владимир Путин бастаған Ресей делегациясына ілтипат білдіріп, өлең оқыған.
Бұдан кейін кәсіби суретші Әсел Сабыржанқызы (Ассоль) Владимир Путин Астанаға ұшқан сәтте сала бастаған картинасын таныстырған. Ол сондай-ақ мемлекеттер басшыларына полотноны жазуға үлес қосуды ұсынды. Картина Ресей президентіне сапар соңында сыйға тартылады.
Тоқаевтің Путинді Ақордада қарсы алу рәсімі де өтті. Қазір екі президент келіссөз жүргізіп жатыр.