Астанада қаңғыбас иттер неліктен иесіз қаңғып жүргеніне «Сарайшық» ауданы әкімдігі түсініктеме берді, деп жазады Ulysmedia.kz.
ЖЕЛІДЕГІ ВИДЕО
Бұған дейін әлеуметтік желіде Қалдаяқов көшесінде қаңғыбас иттердің өріп жүргені жөнінде видео тараған еді. Оны түсірген азамат “ананы қара, иттер шұбырып жүр” дейді. Көшеде оларды көрген адамдардың сескене өтіп бара жатқанын байқауға болады.
ӘКІМДІК НЕ ДЕЙДІ
Ulysmedia.kz порталы осы видеоның мән-жайын әкімдіктен сұрап білді.
Аталмыш жағдай Қалдаяқов көшесінде орын алды. Бос жүрген иттерді анықтаған бетте бірден “Астана Ветсервис” қызметкерлеріне хабар бердік. Бригада көрсетілген мекенжайға шығып, сол маңайға тұзақ орнататынын жеткізді. Сонымен қатар, аталған орын күнделікті аралау мекенжайларына қосылатынын айтты, – деп жауап берді Астана қаласы«Сарайшық» ауданы әкімінің орынбасары Мұхамедияр Қожекенов.
Оған қоса Қожекенов иесіз иттерді көрген жағдайда 8-701-112-23-15, 8-700-724-82-10 нөмірлері арқылы бірден “Астана Ветсервис” ұйымына хабарласуға болатынын жеткізді.