Қазақстанда микро және шағын бизнесті ҚҚС төлеуден толық босату мүмкіндігі қарастырылып жатыр, деп хабарлайды Ulysmedia.kz.
МИКРО ЖӘНЕ ШАҒЫН БИЗНЕС ҮШІН
Ұлттық экономика вице-министрі Бауыржан Омарбеков Маңғыстау облысында кәсіпкерлермен кездесу барысында микро және шағын бизнесті қосылған құн салығын (ҚҚС) төлеуден босату мүмкіндігі қарастырылып жатқанын мәлімдеді. Оның айтуынша, бұл шара азық-түлік пен әлеуметтік маңызы бар тауарлардың бағасының өсуін тежеуге көмектеседі.
Талқылауға қатысқан кәсіпкерлер салық саясатына өзгерістер енгізу кезінде олардың пікірін ескеріп, бизнеске ықтимал әсерін мұқият бағалау қажеттігін атап өтті.
БҰҒАН ДЕЙІН
Вице-премьер әрі ұлттық экономика министрі Серік Жұманғарин қосымша құн салығының өсімі қосымша инфляцияны 3% дейін арттыратынын болжаған еді.
ЖҰМАНҒАРИН НЕ ДЕЙДІ
Ұлттық экономика министрі Серік Жұманғарин қосымша құн салығының өсімі қосымша инфляцияны 3% дейін жеткізетінін мойындайды. Бірақ оның әсерін бір жыл ішінде басамыз деп жауап береді. Ведомство басшысы қосымша құн салығын 16% - ға дейін арттырумен қатар, үкімет мөлшерлемелерді саралауды енгізетінін еске салды: экономиканың кейбір секторлары 10% төлейді, ал агросектор салықтың осы түрінен босатылады.
"Ставкалар көп болған кезде бухгалтерлік есеп, декларация жасау күрделене түседі, дебеттік сальдо жинақталады. Бұған жол бермеу үшін біз 16%, 10%, 0% мөлшерлемесін ұсынамыз” деп Жұманғарин нақтылады.
Еске сала кетсек, Үкіметтің экономикалық блогы сарапшылар тобымен бірлесіп, бюджет-салық және тариф саясаты реформалары бойынша жаңа тәсілдер әзірлеп жатқанын хабарлағанбыз.