АҚШ Қытайда қызмет ететін мемлекеттік қызметкерлеріне, олардың отбасыларына және құпия мәліметтерге қол жеткізу мүмкіндігі бар мердігерлерге Қытай азаматтарымен «романтикалық немесе жыныстық қарым-қатынас» орнатуға тыйым салды, деп хабарлайды Ulysmedia.kz.
Жасырын тыйым: АҚШ-тың жаңа шектеулері
Associated Press агенттігі дереккөздеріне сүйене отырып, бұл шектеудің қаңтар айынан бастап күшіне енгенін анықтады. Оны енгізген – сол кездегі АҚШ-тың Қытайдағы елшісі Николас Бёрнс. Шенеуніктерге тыйым туралы ауызша және электронды пошта арқылы хабарланғанымен, бұл ресми түрде жарияланбаған.
Тыйым АҚШ-тың Қытайдағы барлық өкілдіктеріне тарайды. Оған Бейжіңдегі елшілік, сондай-ақ Гуанчжоу, Шанхай, Шэньян және Уханьдағы консулдықтар мен Гонконгтағы АҚШ консулдығы кіреді.
Дереккөздердің айтуынша, қытай азаматтарымен бұрыннан қарым-қатынаста жүрген америкалық шенеуніктер ерекше жағдай жасау туралы өтініш бере алады. Егер олардың өтініші қабылданбаса, оларға бұл қарым-қатынасты тоқтату немесе қызметтен кету міндеттеледі.
2024 жылдың жазында АҚШ Қытайдағы қызметкерлеріне жергілікті азаматтармен қарым-қатынас құруға алғашқы шектеу енгізген еді. Ол кезде бұл тыйым тек елшіліктер мен консулдықтарда күзетші және басқа көмекші қызметтерде жұмыс істейтін ҚХР азаматтарына қатысты болды.
Мұндай шектеулер қырғи-қабақ соғыс кезеңінде кең тараған. Мемлекеттік департаменттің құпиясыздандырылған құжаттарына сәйкес, АҚШ билігі 1987 жылы Кеңес одағы, Қытай және социалистік блоктағы басқа елдерде қызмет ететін шенеуніктерге жергілікті тұрғындармен достасуға, кездесуге немесе жыныстық қатынасқа түсуге тыйым салған. Бұл шектеу Мәскеудегі америкалық теңіз жаяу әскерін совет тыңшысы арбағаннан кейін енгізілген. Бірақ 1991 жылы КСРО ыдыраған соң, бұл талаптар жұмсарды.
Бүгінде америкалық дипломаттар мен барлау саласының сарапшылары Қытайдың «бал ұстаған қақпан» (яғни, маңызды тұлғалармен сексуалдық байланыс орнатып, құпия ақпарат алу) әдісін кеңінен қолданатынын айтады.
Бұған дейін ҚХР төрағасы Си Цзиньпиннің АҚШ-тың бұрынғы президенті Дональд Трамппен инаугурациядан кейін алғаш рет кездесуді жоспарлап жатқаны хабарланған болатын.